ဝန်ကြီးဦးကျော်ဆန်း သတင်းစာရှင်းလင်းပွဲအတွင်း စိတ်ခံစားမှုကြောင့် မေးခွန်းအချို့ဖြေကြားခြင်း မပြု

အံ့ဘုန်းမြတ် (၁၂ သြဂုတ် ၂၀၁၁) (ဒီဗွီဘီ)

ဒီကနေ့ နေပြည်တော်က ပြန်ကြားရေးဝန်ကြီးဌာနမှာ ပြုလုပ်နေတဲ့ ပြည်ထောင်စု အစိုးရအဖွဲ့သစ်ရဲ့ သတင်းစာရှင်းလင်းပွဲအတွင်းမှာ သတင်းထုတ်ပြန်ရေး အဖွဲ့ရဲ့ ခေါင်းဆောင် ပြန်ကြားရေးဝန်ကြီး ဦးကျော်ဆန်း စိတ်ခံစားမှုကြောင့်ဟုဆိုကာ မေးခွန်းအချို့ကို ဖြေကြားခြင်း မပြုခဲ့ပါဘူး။

အစိုးရသစ်ရဲ့ သက်တမ်း ၄ လကျော်အတွင်း ပထမဆုံး ပြုလုပ်တဲ့ သတင်းစာ ရှင်းလင်းပွဲအတွင်း အစိုးရ ပြောရေးဆိုခွင့်ရှိသူ ပြည်ထောင်စုဝန်ကြီး ဦးကျော်ဆန်းက ၁၉၈၈ ခုနှစ်နောက်ပိုင်း တပ်မတော်အစိုးရရဲ့ လုပ်ဆောင်ချက်တွေကို ထည့်သွင်း ပြောကြားစဉ် ၀မ်းနည်းမှုဖြစ်ကာ မေးခွန်းတချို့ကို မဖြေကြားခဲ့တာပါ။

အယ်ဒီတာတဦးရဲ့ မေးမြန်းချက်ဖြစ်တဲ့ တိုင်းရင်းဒေသတွေက လက်နက်ကိုင် ပဋိပက္ခတွေနဲ့ ပတ်သက်ပြီး အစိုးရသစ်အနေနဲ့ တွေ့ဆုံဆွေးနွေးမှုတွေ ဘယ်အချိန်မှာ စတင်လုပ်ဆောင်မယ်ဆိုတဲ့ မေးခွန်း၊ တိုင်းပြည်မှာ ရင်ဆိုင်ကြုံတွေ့နေရတဲ့ ပိုက်ဆံအကြွေ ရှားမှုတွေကို ဘယ်လို ဖြေရှင်းပေးမလဲ ဆိုတဲ့မေးခွန်းနဲ့ ဆင်းရဲမွဲတေမှု လျှော့ချနိုင်ရေးအတွက် ငွေချေးမှုတွေအပြင် ဘယ်လိုစီမံကိန်းတွေ ချမှတ် ဆောင်ရွက်ဖို့ရှိလဲဆိုတဲ့ မေးခွန်းတွေကို ဖြေကြားစဉ် ၀န်ကြီးဦးကျော်ဆန်း စိတ်ခံစားမှုတွေ ဖြစ်ပေါ်ပြီး မျက်ရည်များကျ လာတာကြောင့် ဖြေဆိုမှုကို ရပ်နားလိုက်တာလည်း ဖြစ်ပါတယ်။

ဒါနဲ့ပတ်သက်ပြီး သတင်းစာရှင်းလင်းပွဲ တက်ရောက်ခဲ့တဲ့ သတင်းသမားတဦးက ခုလိုပြောပါတယ်။

“ဇေယျာမြတ်ခိုင်မေးတဲ့ မေးခွန်းတွေ မေးတာကို ပြောရင်းပြောရင်းနဲ့ သူဘာသာသူ မျက်ရည်ကျလာတာ ငိုပြီးတော့ တိုင်းပြည်ချစ်တဲ့ စိတ်တွေနဲ့ လုပ်ကြတယ် ဘာညာပေါ့ အိုက်တင်ပေါ့။ သူက အိုက်တင်ပေးတာပေါ့။”

အဲ့ဒီနောက်မှာတော့ အချိန်အနည်းငယ် အနားယူပြီး နာလည်ပေးကြဖို့ ၀န်ကြီး ဦးကျော်ဆန်းက ပန်ကြားပြောဆိုပြီး မေးခွန်းတွေကို ဆက်လက်ဖြေကြားခဲ့ပါတယ်။

“ပြောရင်းပြောရင်းနဲ့  စိတ်ထဲက ဖြစ်သွားတာ။ အဲဒီဟာကို ထိန်းထိန်း သိမ်းသိမ်း ထားပါ၊ ဆောင်ရွက်ပေးပါလို့ ကျနော်ပြောကြားလိုပါတယ်။ မေးခွန်းတွေကို မဖြေနိုင်လို့၊ မဖြေချင်လို့ ဆိုပြီးတော့ သတင်းသမားတွေရဲ့ အမြင်မှာ ထင်သွားနိုင်လို့ပါ။ ကျနော်က ဖြေကြားရတဲ့အပေါ်မှာ ပြောနေရင်း ပြောနေရင်းနဲ့ စိတ်ခံစားမှုတွေ ဖြစ်သွားတာကို နားလည်ပေးကြပါလို့ ကျနော် ပြောကြားလိုပါတယ်။ နောက်တခုက စောစောက သူမေးသွားတဲ့ မေးခွန်းတွေထဲမှာ အသေးစားငွေချေး လုပ်ငန်းအပြင် ကျန်တာတွေကိုရော ဘယ်လိုလုပ်မှာလဲ ဆိုတာကို သူသိချင်တဲ့အတွက် ၀မ်းသာပါတယ်။ အဲဒီအပေါ်မှာ ကျနော်ပြောချင်တာကတော့ သိချင်ရင် အားလုံးပူးပေါင်းကြဖို့ ဆိုတာပါပဲ။ အားလုံးက အသိစိတ်ရှိရှိ ပူးပေါင်းဆောင်ရွက်ကြမှ တိုင်းပြည်တိုးတက်မှာပါ။ ”

ဒီလိုဖြစ်ခဲ့တာနဲ့ ပတ်သက်ပြီး သတင်းစာရှင်းလင်းပွဲ တက်ရောက်နေတဲ့ မြန်မာနိုင်ငံစာပေနှင့် စာနယ်ဇင်းအဖွဲ့ အထွေထွေအတွင်းရေးမှူး ဦးကိုကို (စက်မှုတက္ကသိုလ်) က အခုလိုပြောပါတယ်။

“ဆင့်ပွားပြီး ချိတ်ဆက်ပြီးတော့ တခြားအကြောင်းအရာတွေကို ပြောဆိုတဲ့ အချိန်မှာ သူ စိတ်ခံစားမှု တခု ရသွားတယ်။ ဒါကတော့ ကျနော်ထင်တယ် လူသားတယောက် အနေနဲ့ ဖြစ်တဲ့ စိတ်ခံစားမှုပါပဲ။ ကျနော် မြင်တာကတော့ ဝန်ကြီးအနေနဲ့ သူ မချိတင်ကဲ ဖြစ်သွားပုံရပါတယ်။ ယခင်အစိုးရရဲ့ လုပ်ဆောင်မှုတွေ အပေါ်မှာ သူတို့ ၈၈ အပြီး နောက်ပိုင်းမှာ တိုင်းပြည်ဖရိုဖရဲ ဖြစ်နေတဲ့ အချိန်မှာ ရုန်းကန် လှုပ်ရှားရတယ်ပေါ့ဗျာ။ ရုန်းကန်လှုပ်ရှားရတဲ့ အပေါ်မှာ ပင်ပန်းခံပြီး လုပ်ရတဲ့အပေါ်မှာ ပေါ့ဗျာ။ ဒါလေးကို အသိမှတ်ပြုတာလေး မရှိတဲ့ အပေါ်မှာ သူ နည်းနည်းလေး ခံစားသွားတဲ့ မချိတင်ကဲလေးပါ။ အဲဒီလို ဖြစ်သွားတယ်လို့ ကျနော် ထင်တယ်။ တကယ့် တကယ်ကတော့ ဝန်ကြီးကိုယ်တိုင်ပဲ ပိုသိလိမ့်မယ်ဗျ။”

ဒီသတင်းစာရှင်းလင်းပွဲ အတွင်းမှာတော့ သတင်းထောက်တွေကို မေးခွန်း မေးမြန်းခွင့် အချိန် မိနစ် ၄၀ လောက် ပေးခဲ့ပြီး ပြည်တွင်းပြည်ပ သတင်းသမား ၁၀ ကျော်က မေးခွန်းတွေကို အသီးသီး မေးမြန်းခဲ့ကြပြီး ၀န်ကြီးနဲ့အတူ အစိုးရသတင်းထုတ်ပြန်ရေး အဖွဲ့ဝင်တွေက ပြန်လည် ဖြေကြားခဲ့ပါတယ်။