ခရီသွား

This category contains 8 posts

ဒေါ်အောင်ဆန်းစုကြည် ပုဂံဘုရားဖူးခရီးစဉ် ပြီးဆုံး


အံ့ဘုန်းမြတ် (၈ ဇူလိုင် ၂၀၁၁) (ဒီဗွီဘီ)

မြန်မာ့ရှေးဟောင်းယဉ်ကျေးမှု အမွေအနှစ်မြို့တော် ပုဂံမြို့ဟောင်းကို ၄ ရက်ကြာ မိသားစု ဘုရားဖူးခရီးစဉ်အဖြစ် သွားရောက်ခဲ့တဲ့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ သားငယ် ကိုထိန်လင်းတို့ရဲ့ ခရီးစဉ် ဒီကနေ့ ပြီးဆုံးသွားပြီလို့ အဖွဲ့ချုပ် ဗဟိုပြန့်ကြားရေးအဖွဲ့ဝင် ဦးအုန်းကြိုင်က ပြောပါတယ်။

“လေယာဉ်ကွင်းကို မနက် ၁၁ နာရီ ၅ မိနစ်မှာ ချောမောစွာ ဆိုက်ရောက်ပါတယ်။ နေအိမ်ကို ၁၂ နာရီ ၁၀ မိနစ်မှာ ပြန်လည်ရောက်ရှိပါတယ်။”

ဒေါ်အောင်ဆန်းစုကြည်နဲ့ သားငယ်ကိုထိန်လင်းဟာ ပုဂံမြို့ဟောင်းကို ဒီလ ၄ ရက်နေ့က စတင်ရောက်ရှိခဲ့ပြီး ဒီလ ၅ ရက်နေ့မှာ အာနန္ဒာ၊ သဗ္ဗညု၊ မြ​စေတီနဲ့ မနုဟာဘုရား​တို့ကို ဖူးမြော်ခဲ့ပါတယ်။ အဲဒီညနေပိုင်းမှာပဲ နိုင်ငံ​ကျော် ​ရွှေပါရမီ​တောရ ဆရာ​တော် အရှင်ဆန္ဒာဓိကကို ဖူးမြော်ကြည်ညိုခဲ့ပါတယ်။

ဒီလ ၆ ရက်နေ့မှာတော့ ကျောက်ပန်းတောင်းမြို့နယ်၊ ပုပ္ပါးဒေသကို သွားရောက်လေ့လာခဲ့ပါတယ်။ ၇ ရက်နေ့မှာတော့ ပုဂံအနီးက သစ်တောရေးရာ ဦးစီးဌာန က ထိန်းသိမ်းထားတဲ့ ဇီးအိုသစ်လှ သဘာဝပတ်ဝန်းကျင်နဲ့ တိရစ္ဆာန် ထိန်းသိမ်းရေးဥယျာဉ်တွေကို သွားရောက်လေ့လာခဲ့ကြပါတယ်။ ညနေပိုင်းမှာတော့ ညောင်ဦးဈေးကို သွားရောက်လည်ပတ်ခဲ့ပါတယ်။

ဒေါ်အောင်ဆန်းစုကြည်ရဲ့ ဒီခရီးစဉ်တွေမှာ ဒေသပြည်သူတွေက လှိုက်လှိုက်လဲလဲ ကြိုဆိုနှုတ်ခွန်းဆက်ခဲ့ကြပြီး ညနေပိုင်းမှာ သူတည်းခိုခဲ့တဲ့ ပုဂံဟိုတယ်က တာဝန်ရှိသူတွေနဲ့ ၀န်ထမ်းတွေကို ကျေးဇူးတင်ကြောင်း ပြောကြားခဲ့ပြီး ဒီကနေ့ ရန်ကုန်မြို့ကို ပြန်လည်ရောက်ရှိခဲ့တာပါ။

ဒေါ်အောင်ဆန်းစုကြည်ရဲ့ ပုဂ္ဂိုလ်ရေး ဒီခရီးစဉ်နဲ့ ပတ်သက်ပြီး သူ့ရဲ့ လုံခြုံရေးအတွက် မြန်မာပြည်သူတွေ၊ နိုင်ငံရေးအင်အားစုတွေနဲ့အတူ နိုင်ငံတကာကလည်း အထူးစိုးရိမ်ခဲ့ကြပါတယ်။

ဒါ့အပြင် အာဏာပိုင်တွေကလည်း ဒီခရီးစဉ်အတွင်း ဒေသခံတွေကို ကြိုဆိုနှုတ်ခွန်းဆက်တာတွေ မလုပ်ဖို့ ဖိအားပေးပိတ်ပင်တာတွေလည်း ရှိခဲ့ပါတယ်။

ဒေါ်အောင်ဆန်းစုကြည်ရဲ့ ဒီခရီးစဉ်ဟာ မြန်မာနိုင်ငံအတွက် ရှေ့အလားအလာ ကောင်းဖြစ်ဖို့ မျှော်လင့်တယ်လို့လည်း အမေရိကန်အစိုးရ ထုတ်ဖော် ပြောကြားထားပါတယ်။

ဒေါ်အောင်ဆန်းစုကြည်အနေနဲ့ ပုဂ္ဂိုလ်ရေးခရီးစဉ်အပြင် နိုင်ငံရေးခရီးစဉ်လည်း ထပ်မံထွက်ခွာဖို့  ရှိပေမယ့်လည်း အစီအစဉ်အသေးစိတ်ကိုတော့ ပြင်ဆင်နေဆဲ ဖြစ်တယ်လို့ အဖွဲ့ချုပ် ဗဟိုပြန့်ကြားရေးအဖွဲ့ဝင် ဦးအုန်းကြိုင်က ပြောပါတယ်။

Advertisements

ဒေါ်အောင်ဆန်းစုကြည် ၄ ရက်မြောက် ပုဂံခရီးစဉ် ပြည်သူများ လှိုက်လှဲစွာကြိုဆို


အံ့ဘုန်းမြတ် (၇ ဇူလိုင် ၂၀၁၁) (ဒီဗွီဘီ)

မြန်မာ့ရှေးဟောင်းယဉ်ကျေးမှုအမွေအနှစ်မြို့တော် ပုဂံမြို့ဟောင်းကို ရောက်ရှိနေတဲ့ ဒေါ်အောင်ဆန်းစုကြည်ဟာ ဒီကနေ့ ၄ ရက်မြောက် ခရီးစဉ်အဖြစ် ပုဂံအနီးက ဇီးအိုသစ်လှရွာပတ်ဝန်းကျင်နဲ့ ညောင်ဦးဈေးတွေကို သွားရောက်ခဲ့ပါတယ်။

ဒီခရီးစဉ်တွေမှာ ဒေသခံတွေက ဒေါ်အောင်ဆန်းစုကြည်ကို စည်ကားစွာ အားပေးကြိုဆိုခဲ့ကြပါတယ်။

ဒေါ်အောင်ဆန်းစုကြည်နဲ့ သားငယ် ကိုထိန်လင်းတို့ ပါဝင်တဲ့အဖွဲ့ဟာ ဒီကနေ့ ၄ ရက်မြောက် ခရီးစဉ်အဖြစ် ပုဂံအနီးက ဇီးအိုသစ်လှရွာနဲ့ အနီးမှာရှိတဲ့ သစ်တောရေးရာဝန်ကြီးဌာန လက်အောက်ရှိ သစ်တောဦးစီးဌာန၊ သဘာဝတ်ဝန်းကျင်နှင့် တိရစ္ဆာန်ထိန်းသိမ်းက   ဇီးအိုသစ်လှအင်ကြင်းတော သဘာဝထိန်းသိမ်းရေးနယ်မြေ အပါအ၀င် ညောင်ဦးဈေးတွေကို သွားရောက်ခဲ့ကြပါတယ်။

ဇီးအိုသစ်လှရွာမှာတော့ ကျေးရွာ သောက်သုံးရေ ရရှိရေးအပါအ၀င်၊ ဆေးခန်းနဲ့ စာသင်ကျောင်းဖွင့်လှစ်နိုင်ရေးတွေအတွက် ကူညီနိုင်တာတွေကို ပြောကြားခဲ့တယ်လို့ ခရီးစဉ်လုံခြုံရေး တာဝန်ယူထားတဲ့ အဖွဲ့ချုပ်လူငယ်တာဝန်ခံတဦးက ပြောပါတယ်။

“အဲဒီရွာမှာ သဘာဝ ပျက်စီးနေတဲ့ဟာတွေ၊ နောက်ပြီးတော့ အဲဒီရွာမှာ ပေါက်နေတဲ့ အပင်တွေပေါ့နော်။ တကယ့်တောနဲ့ တူတယ်။ ဒီဘက်မှာ တောပြုန်းသွားပြီး ကျန်တဲ့ တောအုပ်ပေါ့နော်။ လိုက်ကြည့်ရင်းနဲ့ အန်တီက အဲဒီမှာ ရေတွင်း တတွင်းပဲ ရှိတယ်ပေါ့နော်။ နောက် ရေတွင်းတွေလည်း လုပ်ဖို့။ နောက်ပြီးတော့ ဆေးပေးခန်း လုံးဝ  မရှိဘူးခင်ဗျ။ ကျန်းမာရေးဆေးပေးခန်း လုပ်ဖို့၊ နောက်ပြီးတော့ စာသင်ကျောင်း တကျောင်းလောက် ထပ် လုပ်ပေါ့နော် တိုက်တွန်းခဲ့တယ် အန်တီကလေ။ အန်တီဘက်ကလည်း ဘာတွေလုပ်ဆောင်မယ် ညာတွေ လုပ်မယ်လို့တော့ အစီအစဉ်တွေ ရှိတယ်လို့ ကြားတယ်ဗျ။”

အဲ့ဒီနောက်   ဇီးအိုသစ်လှအင်ကြင်းတော သဘာဝထိန်းသိမ်းရေး နယ်မြေကို သွားရောက်လေ့လာပြီး တာဝန်ရှိသူတွေက လိုက်လံရှင်းပြခဲ့ပါတယ်။ ဒီအကြောင်းကို ခရီးစဉ်မှာ လိုက်ပါသတင်းယူနေတဲ့ သတင်းထောက်တဦးက အခုလိုပြောပြပါတယ်။

“ကျနော်တို့က ဝန်ထမ်းဟုတ်မဟုတ်တော့ မသိဘူး။ ယူနီဖောင်းမပါဘူး။ ဒါပေမယ့် လူတယောက် တော်တော်လေးကို လိုက်ရှင်းပြတယ်။ ဗမာလိုရော၊ အင်္ဂလိပ်လိုရော ကောင်းကောင်း ရှင်းပြတယ်။ သူတို့ ဘယ်လို take care လုပ်ထားတယ် ဆိုတဲ့အကြောင်း၊ နောက် အန်တီကလည်း သိချင်တာတွေ အကုန်မေးတယ်။ သူတို့ အကုန်ပြောပြပါတယ်။ သိချင်တာ မေးပြီးတော့မှ အင်ကြင်းကျောက် ကြည့်ချင်တယ် ဘယ်နားမှာလဲတဲ့။ အင်ကြင်းပင်က ကျောက်ဖြစ်နေတဲ့ဟာပေါ့နော်။ လိုက်ပြမယ်ဆိုပြီး သူတို့ သွားကြပြီး နောက်ပြီးကျတော့ မရှိဘူးတဲ့၊ မရှိဘူးဆိုတာ ရှိတယ်။ ဒါပေမယ့် သဲပြန်ဖုံးသွားတာတို့ ဘာတို့ ဖြစ်သွားပြီးတော့မှ တော်တော်တူးယူရမှာတဲ့၊ အချိန်တော်တော်ယူလိမ့်မယ်တဲ့ ကြည့်ဖို့။ မလွယ်ဘူးပေါ့နော် လောလောဆယ်။ အဲဒါဆိုလည်း ထားလိုက်ပါတော့တဲ့ ဒေါ်အောင်ဆန်းစုကြည်က။”

ဒီခရီးစဉ်အတွင်းမှာလည်း ဒေသခံတွေအများအပြား လာရောက်ပြီး ဒေါ်အောင်ဆန်းစုကြည်ကို နှုတ်ဆက်ခဲ့ကြပါတယ်။

အဲ့ဒီနောက် ညနေပိုင်းမှာ ဒေါ်အောင်ဆန်းစုကြည် ညောင်ဦးဈေးကို သွားရောက်တဲ့အခါမှာလည်း ပုဂံ-ညောင်ဦး မြို့ခံတွေက လှိုက်လှိုက်လှဲကြိုဆိုခဲ့ကြတယ်လို့ ခရီးစဉ်လုံခြုံရေးတာဝန်ယူထားတဲ့ အဖွဲ့ချုပ်လူငယ်တာဝန်ခံက အခုလို ပြောပါတယ်။

“ညောင်းဦးဈေးထဲကို ဒီကနေ ဟိုတယ်ကနေ ညောင်ဦးထွက်တဲ့ အချိန်မှာ ညောင်ဦးဈေးနား ရောက်တဲ့အချိန်မှာ လူတွေက အရမ်းများနေတယ်။ အဲဒါ ကျနော်တို့ ညောင်ဦးဈေးထဲကို ဝင်တယ် ပစ္စည်းဝယ်ဖို့။ အန်တီဝင်တဲ့အချိန်မှာ တော်တော်လေး တိုးယူရတယ်ပေါ့နော်။ ညောင်ဦးဈေးသူ ဈေးသားတွေရော၊ ညောင်ဦး မြို့ခံသူ မြို့ခံသားတွေရော အကုန်လုံး ပန်းစည်းတို့ ပန်းတို့နဲ့ပေါ့နော် ကြိုဆိုနေတယ်။ ကျနော်တို့ ဝယ်မယ့်ဆိုင်ကို သွားဝယ်တယ်။ တော်တော်တိုးယူရတယ်ဗျ။ ဆိုင်ကယ်တွေနဲ့ရော ကားတွေနဲ့ရော လာပြီးတော့နော် နှုတ်ဆက်တဲ့ လူတွေ များပါတယ်ဗျာ။ ကြိုဆိုကြတဲ့ လူတွေ တော်တော်များပါတယ်ဗျာ။”

ဒီလိုညောင်ဦးဈေးမှာ မြို့ခံတွေက လှိုက်လှိုက်လှဲလှဲကြိုခဲ့ကြပုံတွေကို လိုက်ပါသတင်းယူနေတဲ့ သတင်းထောက်တဦးက အခုလိုပြောပါတယ်။

“ရောက်လာပြီ ဆိုကတည်းက အပေါက်ဝကတည်းက ဝင်မရတော့ဘူး။ ပန်းတွေနဲ့ ကြိုတယ်၊ နောက် လက်ဆောင်တွေ ပေးတာလည်း မနည်းဘူး။ အခု ယွန်းထည်အရုပ်တွေလို အိမ်မှာ အလှထားတယ်လေ ဒေါင်းလိုဟာမျိုးတွေ အဲဒါပေးတယ်။ အများကြီးပဲ ပစ္စည်းတွေကတော့ ဝိုင်းပေးကြတာ။ လူအုပ်ကြီးက တအားများလာတော့ အန်တီက ဘယ်လောက် ကြာသွားလဲဆိုတော့ မိနစ် ၂၀ ကျော်လောက်ပဲ သူနေနိုင်လိုက်တယ်၊ မနေနိုင်ဘူး။ အစိုးရဘက်ကတော့ လုံခြုံရေးတော့ သီးသန့်ပေးထားတာ မရှိဘူး။ အန်အယ်လ်ဒီကတော့ သူ့လုံခြုံရေးသူပေါ့၊ သူပါလာတဲ့လူ။ ဒါပေမယ့် အဲဒီလောက်လူများသွားတာ သူတို့လည်း ဘာမှ မလုပ်နိုင်ပါဘူး။ လေးငါးယောက်လောက် ၀ိုင်းရံထားပြီး လူအုပ်ကို မတိုးပါနဲ့ မတိုးပါနဲ့ ဘာမှ တောင်းပန်လို့ မရဘူး။ ကျန်းမာပါစေ ချမ်းသားပါစေလို့ အော်တာမျုိုးမဟုတ်ဘူးဗျ။ သူ့ဟာသူ အန်တီကျန်းမာပါစေ အဲဒီလိုမျိုး ဝိုင်းပြီး လက်ဆွဲနှုတ်ဆက်ပြီး လက်ဆောင်ပေးကြတာ များတယ်။”

ဒေါ်အောင်ဆန်းစုကြည်ရဲ့ ပုဂံခရီးစဉ် အတွင်းမှာပဲ ဒုတိယနေ့ဖြစ်တဲ့ ၅ ရက်နေ့ ညနေပိုင်းကလည်း အချိန်ကာလ တိုက်ဆိုင်စွာနဲ့ ပုဂံကိုတရားပွဲကြွချီလာတဲ့ နိုင်ငံကျော် ရွှေပါရမီတောရ ဆရာတော် အရှင်ဆန္ဒာဓိကကို ပုဂံဟိုတယ်မှာ တွေ့ဆုံ ဖူးမျှော်ခဲ့ပါသေးတယ်။

ဒီမှာ ဆရာတော်နဲ့ ဒေါ်အောင်ဆန်းစုကြည် အပြန်အလှန်လျှောက်ထား မိန့်ကြားတာတွေကိုလည်း လိုက်ပါခွင့်ရခဲ့တဲ့ ခရီးစဉ် လုံခြုံရေးတာဝန်ယူထားတဲ့ အဖွဲ့ချုပ်လူငယ်တာဝန်ခံကပဲ အခုလို ပြောပြပါတယ်။

“ဆရာတော်ကလည်း ပုဂံမှာ တရားလာဟောတဲ့ အချိန်ဖြစ်တယ်။ အန်တီကလည်း ဒီရောက်နေတယ်။ နောက်ပြီးတော့ အန်တီကို တွေ့ချင်တယ်၊ အန်တီကလည်း တွေ့ချင်တယ်ဆိုတော့ အဲဒါ ကျနော်တို့ ဆရာတော်အခန်းကို သွားပြီးတော့ ကျနော်တို့ ဆရာတော်ကို သွားဖူးပါတယ်ပေါ့နော်။ ဆရာတော်ကလည်း ကျနော်တို့ကို စာအုပ်တွေ၊ တရားစာအုပ်တွေ၊ နောက် တရားအကြောင်းတွေ ဆရာတော်နဲ့ အန်တီနဲ့ တော်တော်များများ ပြောဖြစ်ပါတယ်။ နောက် ဆရာတော်ကလည်း ပရဟိတ လုပ်ငန်းလေးတွေ လုပ်နေတယ်။ အန်တီကလည်း လုပ်နေတယ်ဆိုတော့ ကိုယ့်ဗမာလူမျိုးတွေအတွက် ဗမာပြည်တွင်းအတွက် လုပ်ရမယ် ပေါ့နော်။ အဲဒါတွေ တော်တော်များများ ပြောဖြစ်ပါတယ်။ ဆရာတော်ကလည်း နိုင်ငံရေးနဲ့ ဘာသာရေး ဘာညာဆိုတာလည်း ဒါ ဆက်နွှယ်နေတာပဲလေ။ ဆရာတော် မိန့်သွားတာကတော့ ဗိုလ်ချုပ်အောင်ဆန်း တိုက်ယူပေးခဲ့တဲ့အတွက် ဘာသာ၊ သာသနာလည်း ကျန်နေတယ်ပေါ့နော်။ အဲဒီအတွက် သူတို့လည်း ဘာသာကို ထွန်းကားအောင် ဆရာတော်ကလည်း ဆရာတော်အပိုင်း ဘာသာ သာသနာအတွက်ကို သူလည်း ကြိုးစားအားထုတ်ပြီးတော့ လုပ်တယ်၊ နောက်ပြီးတော့ ပရဟိတလုပ်ငန်းတွေကို ဆရာတော် လုပ်တယ်ဆိုတဲ့ အကြောင်းတွေ ဆရာတော်က ပြောပြတယ်။ နောက်လုပ်မယ့် အစီအစဉ်လေးတွေကိုလည်း ပြောပြတယ်။ နောက် အန်တီကလည်း အန်တီလုပ်နေတဲ့ ဟာလေးတွေ နောက်လုပ်မယ့် ဟာလေးတွေ ဆရာတော်နဲ့ပေါ့နော် ဖလှယ်ကြတယ်ပေါ့နော်။ ဒါပေမယ့် ဆရာတော်ကလည်း ဘာပြောလဲဆိုတော့ ဒေါ်အောင်ဆန်းစုကြည် အသက် ၂၀ လောက်ကသာ အိမ်ထောင်ပြုခဲ့မယ်ဆိုရင် ကျနော်တို့လည်း သားပဲပေါ့နော် ဆိုပြီးတော့ ပြောပါတယ်။ ဆရာတော်ကလည်း အဲဒီလို သဘောလေးပေါ့နော် အဲဒီလို သဘောလေးတွေ ပြောတာပေါ့။ အသက်အရွယ် အပိုင်းအခြားကို ဆရာတော်က ဦးစားပေးပြီး ပြောတာပေါ့နော်။ အားလုံးကလည်း အမေစုလို့ ခေါ်ကြတဲ့အတွက် သူလည်း ခေါ်မယ်ပေါ့နော် အဲဒီလို မျိုးလေးတွေပေါ့နော်။ သူလည်း အဲဒါကို သဘောကြတယ်ပေါ့ဗျာ အားလုံးက အဲလိုမျိုးတွေပေါ့။”

ဒေါ်အောင်ဆန်းစုကြည်ဟာ မိသားစုပုဂံဘုရားဖူးခရီးစဉ်အဖြစ် ဒီလ ၄ ရက်နေ့ ကတည်းက ပုဂံကို ရောက်ရှိနေတာဖြစ်ပြီး ၈ ရက်နေ့ မနက်မှာတော့ ရန်ကုန်ကို ပြန်လည်ထွက်ခွာမှာ ဖြစ်ပါတယ်။

ခရီးသွားလုပ်ငန်းဘုတ်အဖွဲ့က ခရီးသွားလုပ်ငန်း မြှင့်တင်မည်


အံ့ဘုန်းမြတ် ၁၉ မေ ၂၀၁၁ (ဒီဗွီဘီ)

ပြီးခဲ့တဲ့သတင်းပတ်တွေက စတင်ဖွဲ့စည်းထားတဲ့ မြန်မာနိုင်ငံ ခရီးသွားလုပ်ငန်းဘုတ်အဖွဲ့ Myanmar Tourism Board ကနေ ကမ္ဘာလှည့်ခရီးသွား လုပ်ငန်းတွေကို မြှင့်တင်လုပ်ဆောင်ဖို့အတွက် စတင်ဆောင် ရွက်နေပြီလို့ သိရပါတယ်။

အရင်ဖွဲ့စည်း ပြီးဖြစ်တဲ့ မြန်မာနိုင်ငံဆိုင်ရာ ဟိုတယ်လုပ်ငန်းရှင်များအသင်း၊ မြန်မာနိုင်ငံဆိုင်ရာ ခရီးသွားလုပ်ငန်းရှင်များ အသင်းနဲ့ မြန်မာနိုင်ငံဆိုင်ရာ ဈေးကွက်မြှင့်တင်ရေး အသင်းတွေအပြင် ဟိုတယ်ဝန်ထမ်းများအသင်း၊ ဧည့်လမ်းညွှန်များ အသင်း၊ စားသောက်ဆိုင် လုပ်ငန်းရှင်များအသင်း၊ သယ်ယူပို့ဆောင်ရေး လုပ်ငန်းရှင်များအသင်း၊ အမှတ်တရ လက်ဆောင်ပစ္စည်း အရောင်းဆိုင် လုပ်ငန်းရှင်များ အသင်း၊ ပြည်တွင်းခရီးသွားလုပ်ငန်း ရှင်များအသင်း၊ ကျန်းမာရေးနှင့် အထွေထွေ ၀န်ဆောင်မှုလုပ်ငန်းရှင်များအသင်း၊ ခရီးသွားလုပ်ငန်းဆိုင်ရာ ပညာသင်ကျောင်းများအသင်း စတဲ့အသင်း (၁၁) ခုကို စုပေါင်းဖွဲ့စည်း လုပ်ဆောင်နေတာလည်း ဖြစ်ပါတယ်။ ဒီလို လုပ်ဆောင်နေတာနဲ့ပတ်သက်ပြီး မြန်မာနိုင်ငံ ခရီးသွားလုပ်ငန်း ဘုတ်အဖွဲ့ရဲ့ ဥက္ကဌ ဇေကမ္ဘာကုမ္ပဏီပိုင်ရှင် ဦးခင်ရွှေက အခုလို ရှင်းပြပါတယ်။

“အဲဒီအသင်းအဖွဲ့တွေအားလုံး ၁၁ ဖွဲ့ရဲ့ အပေါ်မှာ Myanmar Tourism Board ဆိုပြီး ရှိမယ်။ ဥပမာ ထိုင်းမှာဆိုရင် TAB လိုမျိုးပေါ့။ စင်ကာပူမှာဆိုရင် လည်း Singapore Tourism Board ဆိုတာ ရှိတယ်။ အဲဒီ Board ကနေ အကုန်လုံး ကိုင်ထားတာ၊ လိုင်စင်ကိစ္စတို့ ဘာတို့ ညာတို့ကအစ အကုန်လုံး အဲဒီ Board က ကိုင်တယ်။ ပြီးတော့မှ ၀န်ကြီးဌာနနဲ့ ညှိနှိုင်းပြီး လုပ်သွားတယ်။ ၀န်ကြီးဌာန တခုတည်းအနေနဲ့ လုပ်တယ်ဆိုတာထက် အန်ဂျီအိုအဖွဲ့ကြီးတဖွဲ့ ပါလာရင် ၀န်ကြီးဌာနမှာ ပိုပြီးအားရှိလာမယ်။ ၀န်ကြီးဌာမှာက သူ့အကန့်အသတ်တွေက အများကြီး ရှိနေတာကို။”

ဒီခရီးသွားလုပ်ငန်းဘုတ်အဖွဲ့အောက်က အသင်းတွေအနေနဲ့ ဧည့်လမ်းညွှန်တွေ၊ ဟိုတယ်ဝန်ထမ်းတွေနဲ့ ခရီးသွား လုပ်ငန်းမှာ အကျွမ်းဝင်နေတဲ့ ၀န်ဆောင်မှုလုပ်ငန်းတွေကို လုပ်ကိုင်နေကြသူတွေအတွက် အရည်အသွေး မြှင့်တင်ရေး မွမ်းမံသင်တန်းတွေ ဖွင့်တာ၊ ဟိုတယ်ဇုန်တွေထပ်တိုးချဲ့တာ စတဲ့အရာတွေကို လုပ်ဆောင်သွားကြမှာလည်း ဖြစ်ပါတယ်။ ဒီဘုတ်အဖွဲ့ကို ဗဟိုအလုပ်အမှုဆောင် ၂၅ ယောက် အပါအ၀င် ဗဟိုအဖွဲ့ဝင် ၆၀ လောက်နဲ့ ဖွဲ့စည်းထားပြီး ဖွဲ့စည်းပုံကို ဦးခင်ရွှေက အခုလို ပြောပါတယ်။

“ကိုအောင်မြတ်ကျော်ကို အထွေထွေအတွင်းရေးမှူးပေးဖို့ လျာထားတယ်။ ကိုသက်လွင်တိုးကို တွဲဖက်အထွေထွေ အတွင်းရေးမှူးပေါ့လေ။ နောက် ကိုညီညီ သူ့ကိုလည်း လျာထားတယ်။ လူငယ်တွေ အဓိကလျာထားတယ်။ နောက်တခါ အတွင်းရေးမှုးအဖွဲ့ဆိုပြီး ဖွဲ့ဖို့လုပ်ထားတယ်။ အဲဒီမှာလည်း ပါတဲ့အဖွဲ့တွရဲ့ ဥက္ကဌတွေ အကုန်လုံးက အတွင်းရေးမှူးအဖွဲ့ထဲမှာ ပါတယ်။ ပြည်တွင်းရော ပြည်ပရော အကုန်မှာ လုပ်နိုင်အောင် စီစဉ်ထားတယ်။”

အခုလို ခရီးသွားလုပ်ငန်းဘုတ်အဖွဲ့ ဖွဲ့စည်းပြီး လုပ်ဆောင်ရတာကို လက်ရှိ ကြုံတွေ့နေရတဲ့ ခရီးသွား လုပ်ငန်းအခြေအနေတွေနဲ့ နှိုင်းယှဉ်ပြီးတော့လည်း ဦးခင်ရွှေက အခုလို ပြောပါတယ်။

“ဆိုက်ရောက်ဗီဇာစာတွေ အိုပင်းလွှတ်ပေးမှာ။ လောလောဆယ် လွှတ်လိုက်ရင် လာမယ့် ပွင့်လင်းရာသီကျရင် လူသိပ်များရင်လည်း မထိန်းနိုင်ဘူးလေ။ ခရီးသွားက လက်ရှိ အန်ကယ်တို့ဆီ ၀င်နေတာက ၃ သိန်းလောက်ပဲ ရှိတယ်။ ၃ သိန်းဝင်တာတောင် ဒီမှာက သိပ်ပြီးတော့ ၀န်ဆောင်မှုက မပြည်စုံဘူး။ မပြည့်စုံတော့ ၅ သိန်းတို့ ၁ သန်းတို့ ၀င်သွားတယ်ဆိုရင် တော်တော် ဒုက္ခရောက်မယ့် သဘော ရှိတယ်။ လာတဲ့အခါကျရင် ရန်ကုန်မှာကိုက ၀န်ဆောင်မှုတွေ မလုံလောက်ဘူး။ ဒီလို ဆိုရင် ကိုယ့်ဗမာပြည်ခေါ်ပြီးတော့ ကိုယ့်သိက္ခာကိုယ် ချသလို ဖြစ်သွားမှာ ပေါ့။”

ပြီးခဲ့တဲ ၂၀၁၀ ပြည့်နှစ်ထဲ ကမ္ဘာလှည့်ခရီးသည် သုံးသိန်းကျော် ၀င်ရောက် လည်ပတ်ခဲ့ပြီး အိမ်နီချင်းနိုင်ငံတွေဖြစ်တဲ့ လာအိုကို ခရီးသည် တသန်းကျော်၊ ကမ္ဘောဒီးယားကို ၂ သန်းကျော်၊ ဗီယက်နမ်ကို ၄ သန်းကျော် ၀င်ရောက် လည်ပတ်ခဲ့ပါတယ်။

မြန်မာအင်တာနေရှင်နယ် ရုပ်သံလိုင်း စတင်ထုတ်လွှင့်


မြန်မာအင်တာနေရှင်နယ် ရုပ်သံလိုင်း စတင်ထုတ်လွှင့်

အံ့ဘုန်းမြတ် ၂ ဧပြီ ၂၀၁၀

http://burmese.dvb.no/news.php?id=10458

မြန်မာနိုင်ငံရဲ့ တခုတည်းသော အင်္ဂလိပ်ဘာသာ ရုပ်သံလိုင်း တခုဖြစ်တဲ့ MRTV- 3 ကို မြန်မာအင်တာနေရှင်ရုပ်သံလိုင်းအဖြစ် ပြောင်းလဲပြီး တရားဝင် စတင် ထုတ်လွှင့်ပြသနေပါပြီ။ ပြန်ကြားရေးဝန်ကြီးဌာန လက်အောက်ရှိ မြန်မာ့အသံနှင့်ရုပ်မြင်သံကြားကနေ ထုတ်လွှင့်နေတဲ့ အင်္ဂလိပ်ဘာသာအစီအစဉ် MRTV- 3 ကို မြန်မာအင်တာ နေရှင်နယ်အဖြစ် မတ်လ ၃၁ က စတင်ပြီး ထုတ်လွှင့်ပြသနေတာပါ။ လက်ရှိ ထုတ်လွှင့်ပြသနေတဲ့ အစီအစဉ်တွေနဲ့ ပတ်သက်ပြီး ပြည်တွင်းက သတင်းသမားတဦးက အခုလိုပြောပြပါတယ်။

“စင်္ကာပူက ငှားထားတဲ့ နိုင်ငံခြားသားတွေက အစီအစဉ်တခုလုံးအတွက် ပြောကြတာ။ အဓိကက Travel & Tourism (ကမ္ဘာလှည့်ခရီးသွားလုပ်ငန်း) ပေါ့ အဲဒါကို သူတို့ ဦးစားပေးထားတယ်။ Culture (ယဉ်ကျေးမှု) ၊  Traditional (ရိုးရာ အစဉ်အလာ) စတဲ့ (အစီအစဉ်) အသစ်လေးတွေတော့ နည်းနည်းပါတော့ပေါ့လေ။ Environment (ပတ်ဝန်းကျင်အကြောင်း)တွေ။ အဏ၀ါဗေဒ အဲဒီလိုမျိုးတွေပါ ကမ္ဘာက စိတ်ဝင်စားမယ့်ဟာမျိုးတွေပေါ့။ ဒီတီဗွီရဲ့ အနေအထားအရတော့ ခရီးသွားလုပ်ငန်းကို ဦးစားပေး စောင်းပေးလွှင့်နေတာ”

ဒီရုပ်မြင်သံကြား အစီအစဉ်တွေကို နံနက်ပိုင်း MRTV အစီအစဉ်တွေ အပြီး ၉ နာရီ ကနေ ၁၁ နာရီအထိ ထုတ်လွှင့်ပေးနေတာဖြစ်ပြီး ဂြိုလ်တုလိုင်းတွေ မှာတော့ ၂ နာရီစာ အစီအစဉ်ကို ၂၄ နာရီလုံး ပြန်လည် ထုတ်လွှင့်ပေးနေမှာလည်း ဖြစ်ပါတယ်။ မြန်မာအင်တာနေရှင်နယ် ရုပ်သံလိုင်း အစီအစဉ်တွေကို ရွှေသံလွှင်မီဒီယာ ကုမ္ပဏီက တာဝန်ယူ စီစဉ်ပေးနေတာဖြစ်ပြီး လက်ရှိ အခြေအနေကိုလည်း ပြည်တွင်းက သတင်းသမားက

“စင်္ကာပူက Presenter (အစီအစဉ်တင်ပြသူ) တွေကို သူတို့ ငှားထားတာ၊ မတတ်နိုင်တော့လို့ သူတို့က အခုက အဲဒီ နိုင်ငံခြားသားတွေနဲ့ မလုပ်တော့ဘူး ဆိုပြီး အဲဒီ ရွှေသံလွင် ဘက်ကနေ ကြားတဲ့တာာပေါ့နော်။ ဒါပေမယ့် သူတို့မှာ ဒွိဟ ဖြစ်နေတာက နိုင်ငံခြားသားပြောတဲ့ဟာမှပဲ နိုင်ငံခြားသားတွေက ယုံမယ် နားထောင်မယ် ပေါ့နော်။ မြန်မာတွေက ဥကမ Myanmar country is very good  ဆိုတာ မြန်မာတွေက ပြောတဲ့ဟာကို နိုင်ငံခြားသားတွေက နားမထောင်ဘူး။ သူတို့ ကြားထဲမှာ အဲဒါတွေ ဖြစ်နေတာ ဆက်ငှားဖြစ်မယ်၊ မငှားဘူး အခုက အဲဒီလို ဖြစ်နေကြတယ်။”

ဒီအစီအစဉ်ဟာ ကမ္ဘာလှည့်ခရီးသွားတွေကို ဆွဲဆောင်ဖို့ ဖြစ်သလို ခရီးသွား ကုမ္ပဏီတွေနဲ့ ဟိုတယ်ကြောငြာတွေနဲ့ ဈေးကွက်သစ် ဖြစ်လာဖို့ ရည်ရွယ်ပေမယ့်လည်း လက်ရှိအခြေအနေမှာတော့ ၀င်ငွေ သိပ်မရှိသေးဘူးလို့လည်း ရွှေသံလွင် မီဒီယာနဲ့ နီးစပ်သူ တဦးက ဆိုပါတယ်။ မြန်မာအင်တာနနေရယ် ရုပ်သံလိုင်းမှာ နိုင်ငံတကာသတင်း၊ ပြည်တွင်းသတင်း၊ မြန်မာ့ရိုးရာယဉ်ကျေးမှု၊ လူမှုဘ၀ သတင်းမှတ်တမ်း အစီအစဉ်တွေ၊ ဖျော်ဖြေရေး အစီအစဉ်တွေ၊ အင်္ဂလိပ်စာတမ်းထိုး မြန်မာရုပ်ရှင်နဲ့ ဗီဒီယိုဇာတ်ကားတွေကိုလည်း ထည့်သွင်း ပြသမှာ ဖြစ်ပါတယ်။ ဒီရုပ်သံလိုင်း ဖွင့်ပွဲကို မတ်လ ၃၁ ရက်နေ့က နေပြည်တော်ရှိ မြန်မာ့အသံ နှင့် ရုပ်မြင်သံကြား အဆောက်အဦးမှာ ကျင်းပပြုပ်ခဲ့ပြီး ပြန်ကြားရေးဝန်ကြီး ဗိုလ်မှူးချုပ် ကျော်ဆန်း တက်ရောက်ခဲ့ပါတယ်။

ကသာ-ဗန်းမော် မီးရထားလမ်း လမ်းပိုင်းအချို့ကြံ့ခိုင်မှုမရှိ


ကသာ-ဗန်းမော် မီးရထားလမ်း လမ်းပိုင်းအချို့ကြံ့ခိုင်မှုမရှိ

အံ့ဘုန်းမြတ် ၁၇ ဖေဖော်ဝါရီလ ၂၀၁၀

http://burmese.dvb.no/news.php?id=9987

(၂၀၁၀ ခုနှစ်၊ ဖေဖော်ဝါရီလ ၁၈ ရက်။ ဒီမိုကရက်တစ်မြန်မာ့အသံ နံနက်ပိုင်းအသံလွှင့်အစီအစဉ်)

အရှည်မိုင် ၉၇ မိုင်ခန့်ရှိတဲ့ ကသာ-ဗန်းးမော် မီးရထားလမ်းက ကသာ-မိုးဒါးကြီးလမ်းပိုင်းကို မကြာခင်မှာ ဖွင့်လှစ်ဖို့ရှိနေတယ်လို့ သိရပါတယ်။ ရထားလမ်းပိုင်းအတွက် ဆောက်လုပ်ရေးလုပ်ငန်း စီမံကိန်းအတွင်း လာဘ် ပေး လာဘ်ယူတွေ များတာကြောင့် တာဝန်ယူဆောက်လုပ်တဲ့ ကန်ထရိုက်တာတွေ ငွေခိုဆောက်လုပ်မှု တွေကြောင့် ကြံ့ခိုင်မှုမရှိဘူးလို့ သိရပါတယ်။

မိုင် ၁၀၀ ကျော်ရှိတဲ့ နဘား-ကသာ-ဗန်းမော် မီးရထားလမ်းရဲ့ အစိတ်အ ပိုင်းတခုဖြစ်တဲ့ ၁၆ မိုင်ရှိတဲ့ ကသာ-မိုးဒါးကြီးလမ်းပိုင်းကို လာမယ့် ဖေဖော်ဝါရီလ ၂၀ ရက်နေ့မှာ ဖွင့်လှစ်ဖို့ ရှိနေတာပါ။ မီးရထားလမ်း စီမံကိန်းကို ၂၀၀၇ ခုနှစ်က စတင်အကောင်အထည်ဖော်ခဲ့ တာဖြစ်ပြီး သုံးနှစ်တာကာလအတွင်း ၁၆ မိုင်ရှိတဲ့ ဒီမီးရထားလမ်းပိုင်းကို စတင်ဖွင့်လှစ်နိုင်တာ ဖြစ်ပါတယ်။ ဒီလိုဖွင့်လှစ်နိုင်တော့မှာဖြစ်ပေမယ့် ဒီလမ်းပိုင်းမှာရှိတဲ့ မီးရထားလမ်းအပါ အ၀င်တံတားတွေဟာ ကြံ့ခိုင်မှုမရှိပဲ မီးရထားမသွားခင်အချိန်ကပင် ပျက်ဆီးမှုအချို့ရှိနေ တယ်လို့ ရထားလမ်းဆောက်လုပ်ရေး ကန်ထရိုက်တာတွေနဲ့ နီးစပ်သူတဦးက ပြောပါတယ်။

“ပြီးခဲ့တဲ့လက ရထားမဖြတ်ရသေးဘဲနဲ့ တံတားတွေမြေဖို့ရုံနဲ့ တံတား ၃ စင်းက ကျိုးကျခဲ့တယ်။ ကျိုးရတဲ့ အကြောင်းရင်းကတော့ ငွေခိုပြီးတော့ ဆောက်လို့ဖြစ်တယ်။ ငွေခိုရခြင်းအကြောင်းက အတောင်းရမ်း များလို့ ဖြစ်ပါတယ်။”

ကျိုးခဲ့တဲ့ တံတားတွေကတော့ နတ်သမီးချောက်တံတား၊ ဘုံသုံးဆင့်တံတားအပါအ၀င် သုံးစင်းရှိတယ် လို့လည်း သူကပြောပါတယ်။ မီးရထားလမ်းပိုင်းမှာ တံတားငယ်၊ တံတားအလတ်နဲ့ တံတားကြီးအစင်းရေ ၄၀ နီးပါအထိရှိပြီး တံတားတစီးကို ကုန်ကျငွေ သိန်း ၅၀ ကနေ သိန်း ၇၀၀၀ လောက်အထိ ရှိတယ်လို့လည်း ကန်ထရိုက်တာ အသိုင်းအ၀ိုင်း ပုဂ္ဂိုလ်အချို့က ပြောပါတယ်။ ရထားလမ်း ဆောက်လုပ်ရေးလုပ်ငန်းတွေကို ဆောက်လုပ်ရေးဝန်ကြီး ဗိုလ်ချုပ်ခင်မောင်မြင့်နဲ့ နီးစပ်သူဗိုလ်ကြီးမြတ်လင်းက စီမံကိန်းဒါရိုက်တာအဖြစ် ဆောင်ရွက်နေတာဖြစ်ပြီး ဆောက်လုပ်ခွင့်ရရှိတဲ့ ကန်ထရိုက်လုပ်ငန်းရှင်တွေဆီကနေ ရာခိုင်နှုန်းနဲ့ ငွေတောင်း ယူမှုတွေ ရှိတယ်လို့လည်း ကန်ထရိုက်တာတွေနဲ့ နီးတဲ့ အခြားပုဂ္ဂိုလ်တဦးက ပြောပါတယ်။

“တံတားတလုံးဆောက်လို့ရှိရင် ၇ ရာခိုင်နှုန်း ပေးရတယ်။ ဗိုလ်ကြီးမြတ်လင်းကို ၇ ရာခိုင်နှုန်း ပေးရတယ်။ ငွေကြံ့ကြာအောင်လုပ်တယ်။ နောက်တခုက ခန့်မှန်းခြေကလည်း အတိအကျ တွက်တဲ့အခါကျတော့ သူတို့အတွက်မကျန်ဘူး။ မကျန်တော့ သူတို့ခိုးတာပေါ့။ နောက်တခုက လုပ်ငန်းလုပ်တဲ့ အချိန်မှာလည်း သူနဲ့အဆင်ပြေရင် ပြေသလိုဖြတ်တာပေါ့။ ဖြတ်တဲ့အခါကျတော့ ကန်ထရိုက်တွေကလည်း ခိုတာပေါ့။ သံလုံးတွေ အပြည့်ခံရမယ်ဟာတို့။ ဘိလပ်မြေကို ကောင်းတဲ့အမျိုးအစား သုံးရမယ့်ဟာကို တရုတ်အမျိုးအစား သုံးတာတို့ အဲဒါမျိုးတွေနဲ့ ညာကြတာပေါ့ဗျာ။”

ဒီစီမံကိန်းမှာ မြေသားတူးဖော်ရေးကုမ္ပဏီ ၈ ခု၊ တံတားဆောက်လုပ်ရေး ကုမ္ပဏီ ၂၀။ သံလမ်းခင်း ကျောက်တင်သွင်းတဲ့ကုမ္ပဏီ ၃ ခုလောက်ရှိတယ်လို့လည်း သိရပါတယ်။ ဒီထဲမှာတော့ နအဖအစိုးရ ထိပ်တန်း ခေါင်းဆောင်တွေရဲ့ မိသားစုတွေနဲ့ နီးစပ်တဲ့ စီးပွားရေးလုပ်ငန်းရှင်တွေက ပိုင်ဆိုင်ကြတာဖြစ်ပါတယ်။ မီးရထားလမ်းဟာ သွားလာရေးခက်ခဲပြီး ရေလမ်းကို အဓိကထား သွားလာနေရတဲ့ ဒေသခံတွေအတွက် အဆင်ပြေနိုင်ပေမယ့် ဒီလိုအခြေအနေတွေကြောင့် ကြံ့ခိုင်ရေးစိတ်မချရတော့တဲ့ အခြေအနေမျိုး ဖြစ်ပေါ်နေရတယ်လို့လည်း ကသာမြို့ခံတဦးက ပြောပါတယ်။

“ဒီဘက်ပိုင်းကတော့ ကသာနဲ့ မိုးဒါးကြီးဘာညာဆိုရင် လမ်းတွေက မြေလမ်း၊ မိုးတွင်းဆိုရင် ချောင်းရိုးတွေကလည်း နက်တယ်ဗျ။ လမ်းကမရှိဘူး။ မိုးတွင်းဆိုရင် သွားရေးလာရေး အရမ်းခက်ပါတယ်။ တကယ်လို့သာ ရထားလမ်းဖြစ်သွား မယ်ဆိုရင်တော့ အဲဒီဘက်က မိုးဒါးကြီးတို့ ဟိုဘက်က ရွာတွေက တော်တော်လေး အဆင်ပြေသွားမယ်။”

ဒီမီးရထားလမ်းဟာ မန္တလေး-မြစ်ကြီးနား မီးရထားလမ်းပေါ်က နဘားဘူတာကနေ ကသာမြို့ကိုဖြတ်ပြီး ဧရာဝတီမြစ်အရှေ့ဘက်ခြမ်း ဗန်းမော်မြို့ကို ဖောက်လုပ်နေတဲ့ မီးရထားလမ်းတခုလည်းဖြစ်သလို တရုတ်နိုင်ငံနဲ့ မီးရထားလမ်းချင်း ချိတ်ဆက် ကုန်သွယ်နိုင်ဖို့ ဖောက်လုပ်နေတာဖြစ်ပါတယ်။

Categories

%d bloggers like this: