ပြည်ခိုင်ဖြိုးကို မဲပေးရန် ရန်ကုန်တက္ကသိုလ်ထဲတွင် ပညာရေး ဒု-၀န်ကြီး ဟောပြော

အံ့ဘုန်းမြတ် ၂၁ ဇူလိုင် ၂၀၁၀ (ဒီဗွီဘီ)

ရန်ကုန်တက္ကသိုလ်ရှိ ဆရာ၊ ဆရာမတွေ၊ ကျောင်းသူ၊ ကျောင်းသားတွေအနေနဲ့ လာမယ့်ရွေးကောက်ပွဲမှာ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီကို မဲမပေးရင် စစ်အုပ်ချုပ်ရေးနဲ့ပဲ ဆက်သွားရမှာ ဖြစ်တယ်လို့ ပညာရေးဝန်ကြီးဌာန ဒု-၀န်ကြီးက ပြောဆိုစည်းရုံးခဲ့တယ်လို့ သိရပါတယ်။ အခုလ ၂၀ ရက်နေ့က ရန်ကုန်တက္ကသိုလ် ဘွဲ့နှင်းသဘင်ခန်းမမှာ ပြုလုပ်တဲ့ ဟောပြောပွဲမှာ ပညာရေး ဒု-၀န်ကြီး ဦးအောင်မျိုးမင်းက လာမယ့်ရွေးကောက်ပွဲမှာ ကြံ့ခိုင်ဖွံ့ဖြိုးရေးပါတီကို မဲပေးဖို့နဲ့ အဲဒီလို မဟုတ်ရင် ၉၀ ရွေးကောက်ပွဲ ရလဒ်မျိုးပဲ ဖြစ်လာမှာဖြစ်ပြီး စစ်အုပ်ချုပ်ရေးနဲ့ပဲ ဆက်သွားရမှာလို့ ပြောကြားခဲ့တာပါ။ ဦးအောင်မျိုးမင်းရဲ့ ပြောကြားချက်တွေနဲ့ ပတ်သက်ပြီး အဲဒီပွဲကို တက်ရောက်ခဲ့တဲ့ တက္ကသိုလ် ဆရာမတဦးက ပြောပြ ပါတယ်။

“၁၉၉၀ ခုနှစ်ရွေးကောက်ပွဲ တုန်းကနဲ့ အခု မတူဘူး။ ၉၀ ခုနှစ်တုန်းကတော့ တစညကိုမဲမပေးဘဲနဲ့ အန်အယ်ဒီကို မဲပေးလိုက်တဲ့အတွက် အန်အယ်ဒီဟာ အကုန်လုံး အနိုင်ရရှိသွားတယ်။ ဒါပေမယ့် အခုအခါမှာတော့ ရွေးကောက်ပွဲ ၀င်မယ့်ပါတီ ၄၃ ပါတီ ရှိတယ်။ အဲဒီ ၄၃ ပါတီ ရှိတဲ့အခါကျတော့ အရင်တခါလိုပဲ ဖြစ်ခဲ့မယ်ဆိုရင် တိုင်းပြည်က စစ်တပ်က ပြန်ပြီး အာဏာသိမ်းတာမျိုးကိုတော့ အဖြစ်မခံနိုင်ဘူး။ သူ့သဘောက အနှစ်ချုပ်လိုက်ရင် ကြံ့ခိုင်ရေးနဲ့ စစ်တပ်ကို မဲပေးဖို့ နောက်ဆုံး အနှစ်ချုပ်က အဲဒါပဲ။”

ဒု-၀န်ကြီးရဲ့ ဟောပြောစည်းရုံးမှုဟာ တနာရီခန့်ကြာမြင့်ပြီး ဆရာ၊ ဆရာမတွေရော ကျောင်းသူ ကျောင်းသားတွေကပါ စိတ်ဝင်စားမှု မရှိဘူးလို့လည်း အဲ့ဒီတက္ကသိုလ်ဆရာမကပဲ ဆက်ပြောပါတယ်။

“ကျမတို့က အပြန်အလှန် မေးခွန်းထုတ်လို့မရဘူး။ ဒီမြင်ကွင်းက အရမ်းထူးဆန်းတာ၊ အိပ်တဲ့သူက အိပ်နေလိုက်တယ်။ ဒီကိစ္စကို လုံးဝ စိတ်မ၀င်စားဘူး။ စိတ်မ၀င်စားဘူးဆိုတာ စပြောကတည်းကိုက ရွေးကောက်ပွဲ၊ သူတို့ မဟုတ်တာ ပြောမယ် ဆိုတာ သိတဲ့အခါကျတော့ အေးအေးဆေးဆေး နေလိုက်တယ်။”

“နားထောင်ပြီး သူပြောတဲ့ စကားကို ပြန်ဟားတယ်။ တချို့ကျတော့ စာရွက်စာတမ်းတွေနဲ့ တယောက်က လက်ဆင့် ကမ်းလိုက် တယောက်က ပြောလိုက် ရယ်လိုက်မောလိုက်နဲ့ ဟားတိုက်နေတယ်။ ဟားတိုက်နေတော့ သူတို့နဲ့ ပတ်သက်တဲ့ အမျိုးသမီးထင်တယ်။ တတန်းပြီး တတန်းကိုလိုက်ပြီး ကျမတို့ နောက်ဘက်ကလူတွေကို လိုက်ပြီးတော့ အပေါက်တွေ ပိတ်ထားလိုက်ဆိုပြီး မျက်နှာထားတင်တင်းနဲ့ လိုက်ပြောတယ်။ လန့်စရာ သိပ်ကောင်းတာပဲ။ စင်ပေါ်ကလူကလည်း ဟိန်းလား ဟောက်လား ခြောက်လားနဲ့ အောက်ကလူကလည်း အဲလိုမျိုး ပြောတယ်။ တကယ်ထူးဆန်းတယ်၊ စိတ်လည်း ပျက်သွားတယ်။”

ပညာရေးဝန်ကြီး ဒေါက်တာချမ်းငြိမ်းနဲ့ ဒု-၀န်ကြီး ဗိုလ်မှူးချုပ်ဟောင်းဖြစ်တဲ့ ဦးအောင်မျိုးမင်းဟာ လွန်ခဲ့တဲ့ရက်ပိုင်းတွေ ကလည်း အထက်မြန်မာပြည်က တက္ကသိုလ်တွေမှာ ကြံ့ခိုင်ရေးပါတီကို မဲပေးဖို့ ဟောပြောစည်းရုံးမှုမျိုးတွေ ပြုလုပ်ခဲ့ပြီး ထက်မံပြုလုပ်ဖို့ ရှိတယ်လို့လည်း ပညာရေးလောကသားတချို့က ဆိုပါတယ်။ လက်ရှိအနေတွေမှာတော့ နအဖစစ်အစိုးရ ၀န်ကြီးချုပ်ဗိုလ်ချုပ်ကြီးဟောင်း ဦးသိန်းစိန်ကိုယ်တိုင်ပါဝင်ပြီး အရပ်ဝတ်လဲထားတဲ့ ဗိုလ်ချုပ်ဟောင်းဝန်ကြီးတွေ ကိုယ်တိုင် လည်း ၀န်ကြီဌာနတိုင်းလိုလိုမှာ အခုလို မဲဆွဲစည်းရုံးမှုမျိုးတွေ ရှိနေပါတယ်။ ၂၀၀၈ ဖွဲ့စည်းပုံအခြေခံဥပဒကို အတည်ပြုစဉ် တုန်းကလည်း ၀န်ထမ်းတွေ ကြိုတင် ထောက်ခံမဲတွေထည့်ဖို့ ညွှန်ကြားခဲ့တဲ့အတွက် လာမယ့် ရွေးကောက်ပွဲမှာလည်း အဲ့ဒီလိုပြုလုပ်မှာပဲဖြစ်တယ်လို့ အစိုးရ ၀န်ထမ်းတချို့က ဆိုကြပါတယ်။