စကားလေးတစ်ခွန်းရဲ့ နောက်ကွယ်

ကျွန်တော်ဒီနေ့ ရွှေတိဂုံဘုရားကိုရောက်ခဲ့တယ်။ တောင်ဘက်မုဒ်ကနေဘုရားပေါ်တက်တဲ့အခါမှာတော့ အသက်ငါးနှစ်မပြည့်သေးတဲ့ကလေး ငယ်တွေက ပလတ်စတိတ်အိတ်လေးတွေကိုကိုင်ရင်း အိတ်လေးဝယ်သွားပါ။ မ၀ယ်သွားရင်လည်း မုန့်ဖိုးလေးပေးခဲ့ကြပါလို့ လိုက်ခေါ်ကြတယ်။ ကျွန်တော် တော်တော်လည်း ခံပြင်းဒေါသထွက်မိတယ်။ ဒီကလေးတွေဟာ တကယ်တမ်းမှာဆိုရင် စာသင်ခန်းထဲမှာ ရှိနေကြရမယ့် ကလေးတွေ…ဒါမှမဟုတ် မိဘရင်ခွင်မှာ လုံခြုံစွာနဲ့ အိပ်ဆက်နေကြရမယ့်သူတွေပါ။ အခုတော့ သူတို့မိဘတွေဟာ သူတို့သားသမီးတွေရဲ့ တောင်းရမ်းစားသောက်နေမှုကို ခက်ဝေးဝေး လေမိုးလုံခြုံတဲ့နေရာတွေကနေ စောင့်ဆိုင်းနေကြတယ်။ ခြေထောက်မရှိတဲ့ မိဘက မရှိဘူး။ လက်မရှိတဲ့ မိဘက မရှိဘူး။ သူတို့တွေအားလုံးဟာ လွယ်လွယ်ရတဲ့နည်းလမ်းကို အသုံးပြုပြီး ငွေကြေးရှာဖွေနေကြတာလား။ ဒါမှမဟုတ် အရှက်သိက္ခာကင်းမဲ့စွာနဲ့ တောင်းရမ်းစားသောက်ရတဲ့ဘ၀ကို ခုံမင်သွားတာမျိုးလား။ ကျွန်တော်ဘာမှဆက်ပြီး မစဉ်းစားချင်တော့ပါဘူး။ ကျွန်တော့်နောက်ကို တစ်ကောက်ကောက်လိုက်နေတဲ့ ကလေးကို ကျွန်တော့်အိတ်ထဲက ငါဆယ်တန်၊ ဒါမှမဟုတ် တစ်ရာတန်အကြွေတစ်ချို့ ပေးလိုက်ချင်ပါတယ်။ ဒါပေမယ့် ကျွန်တော်ပေးလိုက်တဲ့ ငွေကြေးအနည်းငယ်ရဲ့ နောက်ကွယ်မှာ သူတို့တွေရဲ့ ကိုယ်ကျင့်တရားတွေနဲ့ စိတ်ဓာတ်ရေးရာတွေ ပျက်ပြားသွားစေနိုင်တယ်ဆိုတဲ့အတွေး ကျွန်တော့်ခေါင်းထဲကိုဝင်လာခဲ့တယ်။ ကဲတော်ပြီ မပေးတော့ဘူးလို့ဆိုတဲ့ ဆုံးဖြတ်ကိုချပြီး အဲ့ဒီကလေးကို ကျွန်တော်သွားတော့လို့တစ်ခွန်းပြောလိုက်တယ်။ ကလေးက တော်တော်ခေါင်းမာတယ်။ ဆက်လိုက်လာတယ်။ ကျွန်တော်မျက်နှာကို အတည်ဆုံးဖြစ်အောင်ထားပြီး စေ့စေ့တစ်ချက်ကြည့်လိုက်တယ်။ သူကို ချိုးနှိုမ်တဲ့အကြည့်မျိုး ဆိုတာထက် သူတောင်းရမ်းစားသောက်နေရတဲ့ဘ၀ ကျော်လွန်သွားစေချင်တဲ့စေတနာနဲ့ကြည့်လိုက်တဲ့ အကြည့်တစ်ချက်ပါ။ အဲ့ဒီကလေးငယ်က ကျွန်တော့်ကို သေခြာစေ့စေ့ပြန်ကြည့်ပြီး ပြောလိုက်တဲ့စကားလေးတစ်ခွန်က ကျွန်တော့်ကို တော်တော်တုန်လှုပ်သွားစေခဲ့ပါတယ်။ ဒါကတော့ “ကပ်စေးနည်းကြီး။ ပိုက်ဆံလေးငါးဆယ်တောင်မပေးနိုင်တဲ့ မသာကြီး” ဆိုပြီး ကျွန်တော့်ရှေ့မှ ထွက်ပြေးသွားပါတော့တယ်။

(24-8-2008)