မြန်မာအစိုးရအနေနဲ့  စစ်မှန်တဲ့ အမျိုးသားပြန်လည်သင့်မြတ်ရေးတွေ လုပ်ဖို့ မြန်မာနိုင်ငံရောက်ရှိနေတဲ့ မြန်မာနိုင်ငံဆိုင်ရာ အမေရိကန် အထူးကိုယ်စားလှယ် ဒဲရက်ခ် မစ်ချဲလ် (Derek Mitchell) က တိုက်တွန်းလိုက်ပါတယ်။

ဒီကနေ့ အမျိုးသားလွှတ်တော်နဲ့ ပြည်သူ့လွှတ်တော်ဥက္ကဋ္ဌ၊ လွှတ်တော်ကော်မတီ ခေါင်းဆောင်များ၊ တိုင်းရင်းသား ကိုယ်စားလှယ်များနဲ့ တွေ့ဆုံစဉ်မှာ ဒဲရက်ခ် မစ်ချဲလ် (Derek Mitchell) ပြောကြားလိုက်တာပါ။

ဒဲရက်ခ် မစ်ချဲလ်နဲ့ တွေ့ဆုံခွင့်ရခဲ့တဲ့ ပြည်သူ့လွှတ်တော်ကိုယ်စားလှယ် ဒေါက်တာသန်းဝင်းက “အမေရိကန် ကိုယ်စားလှယ်ကပြောတာတော့ စစ်မှန်တဲ့ တွေ့ဆုံဆွေးနွေးခွင့်၊ စစ်မှန်တဲ့ အမျိုးသားပြန်လည်သင့်မြတ်ရေးဖြစ်ဖို့ အမြဲမပြတ် စောင့်ကြည့်နေတယ်ပေါ့၊ ဒေါ်အောင်ဆန်းစုကြည်နဲ့ တွေ့တဲ့ ကိစ္စနောက်ဆက်တွဲ ဘာတွေဖြစ်လာမလည်းဆိုတာ လက်တွေ့ဖြစ်ရပ်ကို အနီးကပ် သူတို့က သိချင်တယ်တဲ့၊တွေ့ဆုံမှုရဲ့ နေက်ကွယ်မှာ ရှိနေတဲ့ လက်တွေ့ လုပ်ဆောင်မှုကို သူတို့ အဓိက စောင့်ကြည့်နေတယ်” လို့ ပြောပါတယ်။

ပြည်သူ့လွှတ်တော်ဥက္ကဋ္ဌရဲ့ ပြန်လည်ဆွေးနွေးမှုတွေကိုလည်း ဒေါက်တာသန်းဝင်းက အခုလို ပြောပါတယ်။

“ဥက္ကဋ္ဌကြီးကလည်း တိုင်းပြည်အကျိုးပဲ ကြည့်မယ်ပေါ့။ ပါတီအကျိုး ကျန်တဲ့ လူတွေအကျိုး မကြည့်ဘူးပေါ့။ တိုင်းပြည်လူထု အကျိုးစီးပွား ဖြစ်ထွန်းမယ့် ကိစ္စပဲ လွှတ်တော်က လုပ်မယ်။ နောက်ပြီးတော့ အထွေထွေ လွတ်ငြိမ်းချမ်းသာခွင့် အမိန့် ထုတ်ပြန်ပေးဖို့၊ နိုင်ငံရေးအကျဉ်းသားတွေ လွှတ်ဖို့ကိစ္စကိုလည်း လွှတ်တော် တရပ်လုံးက အတည်ပြုပြီးပြီ၊ သမ္မတထံကို တင်ပြပြီးပြီ လွှတ်တော်ရဲ့ သဘောထားကို  အဲဒါတွေ ပြောတယ်။”

အမေရိကန် အထူးကိုယ်စားလှယ် ဒဲရက်ခ် မစ်ချဲလ်နဲ့ အမျိုးသားလွှတ်တော်က တာဝန်ရှိသူတွေ တွေ့ဆုံမှုမှာလည်း ပြောကြားခဲ့တယ်လို့လည်း တွေ့ဆုံပွဲ တက်ရောက်ခဲ့တဲ့ အစိုးရအာမခံချက် စောင့်ကြည့်ရေး ကော်မတီဥက္ကဋ္ဌ ဒေါက်တာအေးမောင်က ပြောပါတယ်။

အမေရိကန်နိုင်ငံ အထူးကိုယ်စားလှယ်တဦးနဲ့ အစိုးရသစ် တွေ့ဆုံမှုတွေနဲ့ ပတ်သက်ပြီးတော့လည်း ဒေါက်တာအေးမောင်က အခုလို မှတ်ချက်ပေး ပြောဆိုပါတယ်။

“တရုတ်နဲ့လည်း အိမ်နီးနားချင်းဆိုတော့ ဆက်ဆံရေးက တော်တော်ကောင်း နေတယ် အင်မတန် အလှမ်းဝေးတဲ့ အင်အားကြီး နိုင်ငံတခုက လာတယ်၊ ဗမာပြည်အရေး စိတ်ဝင်စားတယ် ဆိုတော့ ကျနော်တို့ကတော့  ကောင်းတဲ့ဘက်ကို ဦးတည်လာတယ်လို့ပဲ မြင်တယ်၊ နောက်ပိုင်းမှာ အကြိမ်ကြိမ် တွေ့ပြီးခါမှ စီးပွားရေးပိတ်ဆို့ အရေးယူမှု ရုပ်သိမ်းဖို့ကိုလည်း အိုဘားမားအစိုးရ သဘောပေါက်အောင် ရှင်းပြပေးနိုင်မယ်၊ လက်ရှိဖွဲ့စည်းပုံနဲ့သွားနေတဲ့ အစိုးရသစ် အပေါ်မှာလည်း ပိုပြီး ထဲထဲဝင်ဝင် ဆက်ဆံတာများလာလို့ သဘောပေါက် လာမယ်၊ ဒီလိုဆိုရင် ကာလလေးတခုအတွင်းမှာ စီးပွားရေးနဲ့ ပတ်သက်တဲ့ ပြန်လည် တည်ဆောက်မှု လုပ်ငန်းတွေကို အစိုးရသစ်က အောင်အောင်မြင်မြင် ဆောင်ရွက် သွားနိုင်ဖို့ လမ်းပွင့်သွားနိုင်ပါတယ်။”

အမေရိကန် အထူးကိုယ်စားလှယ် ဒဲရက်ခ် မစ်ချဲလ်အဖွဲ့ဟာ ဒီကနေ့ နေ့လယ်ပိုင်းမှာ နိုင်ငံရေးဝန်ကြီး ဦးဝဏ္ဏမောင်လွင်အပါအ၀င် အစိုးရအဖွဲ့ဝင်တွေနဲ့ တွေ့ဆုံမှုတွေရှိခဲ့ပြီး ညနေပိုင်းမှာတော့ တိုင်းရင်းသားညီနောင်ငါးပါတီက ကိုယ်စားလှယ်တွေနဲ့လည်း တွေ့ဆုံဖို့ရှိနေပါတယ်။

ဒဲရက်ခ် မစ်ချဲလ်နဲ့အဖွဲ့ဟာ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် အပါအ၀င် NLD ပါတီခေါင်းဆောင်တွေနဲ့ ၂၀၁၀ ရွေးကောက်ပွဲဝင် နိုင်ငံရေးပါတီခေါင်းဆောင်တွေနဲ့လည်း ရန်ကုန်မြို့မှာ တွေ့ဆုံဖို့ ရှိနေပါတယ်။

ဒီလ ၁ ရက်နေ့ကစပြီး ဘဏ်အတိုးနှုန်းတွေ ၂ ရာခိုင်နှုန်း လျှော့ချလိုက်တဲ့အတွက် ငွေချေးယူသူတွေအတွက်ပဲ အကျိုးများတယ်လို့ ပညာရှင်တချို့က ဝေဖန်နေကြပါတယ်။

အရင်က အပ်ငွေအပေါ် အတိုးနှုန်း ၁၂ ရာခိုင်နှုန်းပေးပြီး ချေးငွေအပေါ် ၁၇ ရာခိုင် နှုန်း အတိုးကောက်ယူနေရာက အပ်ငွေအပေါ် အတိုးနှုန်း ၁၀ ရာခိုင်နှုန်းထက်မနည်း ၁၂ ရာခိုင်နှုန်းထက်မများဘဲ အတိုးပေးဖို့နဲ့ ချေးငွေအပေါ် ၁၅ ရာခိုင်နှုန်းထက်မများဘဲ အတိုးကောက်ယူဖို့ ဗဟိုဘဏ်က အမိန့်ထုတ်ပြန်ခဲ့တာပါ။

ဒီလိုပြောင်းလဲကျင့်သုံးမှုကြောင့် လုပ်ငန်းတိုးချဲ့လိုတဲ့ စီးပွားရေး လုပ်ငန်းရှင်တွေ အဖို့ အကျိုးပိုများတယ်လို့လည်း ဒီနေ့ထုတ် အစိုးသတင်းစာတွေမှာ ရေးသားပါတယ်။

အတိုးနှုန်းတွေ လျှော့ချဖို့ ပြောင်းလဲလိုက် ပေမယ့် ဘဏ်တွေရဲ့ ၀န်ဆောင်ခက အရင်အတိုင်းပဲဖြစ်လို့ ဘဏ်တွေ တည် ထောင်ထားသူ အများစုဖြစ်တဲ့ လုပ်ငန်းရှင် ကြီးတွေ အကျိုးအမြတ် ရှိမြဲရှိနေပြီး အပ်နှံ သူတွေပဲ အကျိုးလျော့သွားတာလို့ စီးပွား ရေးပညာရှင်တဦးက တွက်ချက်သုံးသပ် ပါတယ်။

“အရင် သူတို့က ၁၂ ကျပ်နဲ့ လက်ခံတယ်၊ ၁၇ ကျပ်နဲ့ ပြန်ချေးတယ်။ အခုကျတော့ ၁၀ နဲ့ လက်ခံတယ်၊ ၁၅ ကျပ်နဲ့ ပြန်ချေးဆိုတော့ သူတို့က ၅ ကျပ်က မြတ်တာ မြတ်တာပဲ။ တကယ်တမ်း ထိတာကတော့ မလုပ်တတ်မစားတတ်လို့ ဘဏ်မှာ ပဲ ရှိတဲ့ဟာလေး ပေါင်ပြီးတော့ သွားထားတဲ့လူတို့လို၊ သက်ကြီးပိုင်းတို့၊ ပင်စင်စားတို့ အတွက်ကတော့ ၂ ကျပ်လျှော့သွားတာ ပေါ့လေ။ ကုန်ဈေးနှုန်းက ကျမှ မကျတာ။”

အတိုးနှုန်းသစ်ကြောင့် ငွေအပ်သူတွေကို အကျိုးနည်းစေပေမယ့် ခုထိတော့ ငွေအပ်နှံသူတွေ ငွေပြန်ထုတ်တာ မတွေ့ရသေးသလို အဲ့ဒီလိုဖြစ်ခဲ့ရင် စိုးရိမ်ရမယ့် အခြေအနေတွေကိုလည်း စီးပွားရေးပညာရှင် ခင်မောင်ညို (ဘောဂဗေဒ) က သုံးသပ်ပြပါတယ်။

“၁၀ ရာခိုင်နှုန်းတောင်မှ ရအောင်မရှာနိုင်တဲ့ လူကတော့ ဘဏ်အပ်ပေါ့။ အခု ကြည့်နေတာက ခွဲထုတ်သွားတဲ့ အရိပ်အရောင်ကတော့ မတွေ့ရသေးဘူး။ စိတ်ပူစရာ တချက်က ဘဏ်ကနေ ခွဲထုတ်ကြတဲ့အတွက် ဘဏ်တွေ ဒုက္ခရောက်မှာ။ ထုတ်သွားတဲ့ ငွေတွေက အကျိုးရှိတဲ့နေရာမှာ ရင်းနှီးမြှုပ်နှံမှု မလုပ်ဘဲနဲ့ မြေတို့၊ အိမ်တို့၊ ကားတို့မှာ သွားကစားလိုက်ရင်လည်း ပိုပြီးတော့ဆိုးသွားနိုင်တယ်။ အတိုးနှုန်းက အရမ်းကြီးတော့ ချပေးလို့ရမယ်လို့တော့ မယူဆဘူး။ ဒီအခြေအနေမှာ တည်ငြိမ်မှုရှိရင်တော့ နောက်တ ဆင့် ထပ်ချပေးဖို့က ဖြစ်နိုင်တယ်လို့ ယူဆတယ်။”

မြန်မာဘဏ်တွေယူတဲ့ ၀န်ဆောင်ခ ၅ ရာခိုင်နှုန်းဟာ အိမ်းနီးချင်း စင်ကာပူနိုင်ငံနဲ့ တန်းတူဖြစ်ပြီး အာဆီယံဒေသတွင်းနိုင်ငံတွေမှာ ၀န်ဆောင်ခ အမြင့်ဆုံးဖြစ်နေတာကို ဝေဖန်သူတွေလည်း ရှိပါတယ်။

အပ်ငွေနဲ့ ချေးငွေ အတိုးနှုန်း ကွာဟမှုပြင်းသွားမှာကိုလည်း စိုးရိမ်တယ်လို့ ခင်မောင်ညို (ဘောဂဗေဒ) က ပြောပါတယ်။

“ဘဏ်တွေက တကယ်တမ်းက လှုပ်လှုပ်ကလေးပဲ ရှိတာ၊ ဘာမှ သိပ်လှုပ်နိုင်တဲ့ အခြေအနေမှာ မရှိဘူး။ အခု ဘဏ်ရဲ့ အဓိကဝင်ငွေက အပ်တာနဲ့၊ နောက်တခုက လွှဲငွေကရတာရယ် ဒါတွေကို အားကိုးနေရတဲ့အခါကျတော့ ကွာဟချက်ကတော့ လျှော့ချလို့ မရသေးဘူး။ လောလောဆယ်မှာ ဘဏ်လုပ်ငန်း ဖွံ့ဖြိုးတိုးတက်လာရင် လျှော့ချလို့ရတယ်၊ ဘဏ်လုပ်ငန်း မဖွံ့ဖြိုးမတိုးတက်သေးရင်တော့ ဒီဟာ လုပ်လို့ မရဘူး။”

ပုဂ္ဂလိကဘဏ်တချို့ကတော့ အပ်ငွေအပေါ် အတိုးနှုန်း ၁၀ ရာခိုင်နှုန်းထက်မနည်း ၁၂ ရာခိုင်နှုန်းထက်မများတဲ့ ပဏာမနဲ့ ပေးနိုင်အောင် ညှိနှိုင်းဈေး သတ်မှတ်ဖို့ စီစဉ်နေ ကြပြီး ဗဟိုဘဏ်ရဲ့ အတည်ပြုချက် ရယူကြရမှာဖြစ်ပါတယ်။

လွှတ်တော်အစည်းအဝေးမှာ အစိုးရအဖွဲ့တာဝန်ရှိသူတွေရဲ့ ပြောဆိုဖြေကြားချက်တွေဟာ လိုရာမရောက်ဘဲ ဆင်ခြေပေး ပြောကြားမှုတွေ များနေတယ်လို့ လွှတ်တော်တက် ကိုယ်စားလှယ်တချို့က ဝေဖန်လိုက်ပါတယ်။

လွှတ်တော် ကိုယ်စားလှယ်တဦးက “အများအားဖြင့်တော့ သူတို့ဖြေရမယ့် ဥစ္စာ ဇဝေဇ၀ါ ဖြစ်တဲ့ ဥစ္စာတွေပေါ့လေ။ နောက်တခါ သူတို့မှာ အဖြေက တိတိကျကျ မရှိတဲ့ဥစ္စာမျိုးကတော့ အဲဒီလိုမျိုး မေးတဲ့မေးခွန်းက တခြား သူတို့ဖြေတာက တမျိုး အဲလို ဖြစ်ကုန်တယ်ဗျ။ အထူးသဖြင့်တော့ ၀န်ကြီးတွေက သူတို့ရဲ့ လုပ်ရပ်တွေကို ကာကွယ်ပေးပြီးတော့ ဖြေသွားတာ များတယ်လေ။ သူတို့ လုပ်နေပါတယ်။ လုပ်နေဆဲ၊ လုပ်ပါမယ်ဆိုတဲ့ စကားမျိုးနဲ့ နောက်ဆုံး ပိတ်ပိတ် သွားတာပဲ တွေ့ရတယ်လေ။ သူတို့က တိတိကျကျ ဖြေဖို့ ကြိုစားတာထက် အဆိုတွေကို ပြန်ရုပ်သိမ်းဖို့အတွက် ဆင်ခြေဆင်လက်တွေ ပေးနေတာပဲ တွေ့ရပါတယ်” လို့ ပြောပါတယ်။

လွှတ်တော်ဥက္ကဋ္ဌတွေက အချိန်ကို တန်ဖိုး ထားဖို့၊ မေးခွန်းတွေကို တိတိကျကျဖြေဖို့ မဆိုင်တာတွေ မပြောဖို့ သတိပေး ထားပေမယ့် ၀န်ကြီးတွေက အလေးအနက် မထားဘဲ ပြောဆိုနေကြတယ်လို့လည်း အခြား ကိုယ်စားလှယ် တချို့က ဆိုပါတယ်။

ဒီလိုပြောဆိုတဲ့ ၀န်ကြီးတွေနဲ့ပတ်သက်ပြီး လွှတ်တော်မှတ်တမ်း တင်ပြီးသား ဖြစ်မယ်လို့လည်း ကိုယ်စားလှယ် ဦးသိန်းညွှန့်က ပြောပါတယ်။

“၀န်ကြီး အကုန်လုံးကိုတော့ ကျနော်က ပြောစရာ မရှိဘူး။ ကျနော်တို့ အားရတဲ့ သဘောကျရတဲ့ ၀န်ကြီးတွေလည်း ရှိတာပေါ့။ သူ့ဝန်ကြီးဌာနက သဘောထားကို သူတို့နားလည်သလို ဖြေတဲ့ သူတွေလည်း ရှိတာပေါ့။ ဒီအပေါ်မှာ လွှတ်တော် ဥက္ကဋ္ဌကလည်း စနစ်ကျဖို့အတွက်၊ အချိန်တွေ တန်ဖိုးရှိရှိ သုံးကြဖို့အတွက် ထိန်းကျောင်းပေးနေပါတယ်။  လွှတ်တော်ကို ဖြေကြပြုကြတဲ့ အခါမှာ လွှတ်တော်ဥက္ကဋ္ဌရဲ့ ထိန်းကျောင်းမှုက အဓိကပဲလေ။ အဲတော့ လွှတ်တော်မှတ်တမ်းထဲမှာ ပါပြီးသားပဲ။ ”

ဝန်ကြီးတွေရဲ့ ဖြေကြားမှုတွေအပြီးမှာ အဆိုတွေ ပြန်ရုပ်သိမ်းပေးရတာ များနေတယ်လို့လည်း ကိုယ်စားလှယ်က ဆိုပါတယ်။

“သူတို့ ၀န်ကြီးတွေက အဲလိုမျိုး ပြောလာပြီဆိုရင် အဲဒီအဆိုက ရှုံးရင်လည်း ရှုံးမယ်။ ရုပ်သိမ်းရင်လည်း ရုပ်သိမ်းရမယ်။ နောက်ဆုံးတော့ သူတို့ ဒီဘက်ကို ဂုဏ်သိက္ခာ ပေးချင်တယ် ဆိုရင်တော့ မှတ်တမ်းအဖြစ်တင် ထားရှိမယ်ပေါ့ဗျာ။ အဲလောက်နဲ့ပဲ နောက်ဆုံး အဆုံးသတ်သွားတာ တွေ့ရတယ်။”

ပြည်သူ့လွှတ်တော်နဲ့ အမျိုးသားလွှတ်တော်တွေမှာ ၀န်ကြီးတွေက မေးခွန်းပေါင်း ၁၅၀ ကျော် ဖြေကြားတာ၊ အဆိုပေါင်း ၅၀ ၀န်းကျင်မှာ ပါဝင် ဆွေးနွေးထားပါတယ်။

လွှတ်တော် နှစ်ရပ်လုံးမှာ တင်သွင်းခဲ့တဲ့ အဆိုပေါင်း ၅၀ ၀န်းကျင်ထဲက ကြံ့ခိုင်ရေးပါတီက ကိုယ်စားလှယ်တွေ တင်သွင်းတဲ့ အဆိုတွေသာအများစု အတည်ပြုခံခဲ့ရပြီး ဒီမိုကရက်တစ်အင်အားစုကိုယ်စားလှယ်တွေ တင်သွင်းတဲ့ အဆို အများစုက ပြန်လည်ရုပ်သိမ်းပေးခဲ့ရသလို မဲခွဲဆုံးဖြတ်ရာမှာလည်း မဲအပြတ်အသတ်နဲ့ ရှုံးနိမ့်ခဲ့ပါတယ်။

သတင်းမီဒီယာတွေနဲ့ဆိုင်တဲ့ ဥပဒေတွေကို ပြန်ကြားရေးဝန်ကြီးဌာနက ဦးဆောင်ရေးဆွဲနေပြီး လွှတ်တော်ကို မကြာခင် တင်သွင်းမယ်လို့ ပြန်ကြားရေးဝန်ကြီးက ဒီနေ့ ပြည်သူ့ လွှတ်တော် အစည်းအဝေးမှာ ပြောပါတယ်။

သတင်းမီဒီယာတွေ လွတ်လပ်စွာ ဖော်ထုတ်ခွင့်ကို ကာကွယ်စောင့်ရှောက်ပေး ရေး ဥပဒေတရပ် ပြဋ္ဌာန်းဖို့ သင်္ဃန်းကျွန်းမြို့နယ် ကိုယ်စားလှယ် ဦးသိန်းညွန့် မနေ့ကအစည်းအဝေးမှာ အဆိုတင်ခဲ့တာကိုတော့ ဒီနေ့အစည်းအဝေးမှာ မှတ်တမ်းတင်ပါတယ်။

ဒီအဆိုနဲ့ပတ်သက်ပြီး ပြန်ကြားရေးဝန်ကြီး ဦးကျော်ဆန်းက မီဒီယာဥပဒေ ပြဌာန်း ဖို့ ပြန်ကြားရေးဝန်ကြီးဌာနက ရှေ့နေချုပ်ရုံးကို ဇူလိုင်ကတည်းက ပေးပို့ထားပြီး အကြံညာဏ်ယူနေပါတယ်၊ စသည်ဖြင့် တင်ပြသွားတယ်လို့ ဦးသိန်းညွန့်က ပြောပြပါတယ်။

“နောက်တပတ် လွှတ်တော်မှာ မဆောင်ရွက်ဘူး ဆိုရင် ကျနော်က ဒီအဆိုကို မှတ်တမ်းတင်ထားတဲ့အပေါ်မှာ အခြေခံပြီးတော့ နောက် လာမယ့် လွှတ်တော်မှာ ကျနော် ထပ်မံဆွေးနွေးမှာပါ”လို့ ဦးသိန်းညွန့်က ပြောပါတယ်။

ပြန်ကြားရေးဝန်ကြီးဌာနက ရေးဆွဲတင်သွင်းလာမယ့် ဥပဒေမူကြမ်းမှာ သတင်းမီဒီ ယာသမားတွေအတွက် ၀န်ထုပ်ဝန်ပိုးဖြစ်မယ့် ဥပဒေမျိုးတွေ ပါဝင်လာရင်လည်း ပြင်ဆင်နိုင်ဖို့ ကြိုးစားမယ်လို့လည်း ဦးသိန်းညွန့်က ပြောပါတယ်။

“သူတို့ တကယ်တင်သွင်းလာရင် အဲဒီ ဥပဒေကြမ်းအပေါ်မှာ ဒီမိုကရေစီ အသွင်ကူးပြောင်းဖို့ အထောက်အကူမပြုဘူးဆိုရင် နိုင်တာရှုံးတာ အပထား ပြင်ဆင်ချက် အဆိုတင်သွင်းပြီးတော့ တိုင်းပြည်ကသိအောင် ကျနော်လုပ်ရမှာပေါ့။ ကျနော်တတ်နိုင် သလောက်တော့ လုပ်မှာ။”

ဝန်ကြီးဦးကျော်ဆန်းက ပြည်သူ့လွှတ်တော်မှာ နာရီအတော်ကြာ ပြောကြားသွား ရာမှာ စာပေလွတ်လပ်ခွင့်ကို ထိန်းချုပ်ထားရတာကိုလည်း ရှင်းလင်းသွားတယ်လို့လည်း ဒီ့ပြင်ကိုယ်စားလှယ်တဦးက ပြောပါတယ်။

“စာပေလွတ်လပ်ခွင့်ဆိုတာကလည်း စည်းမဲ့ကမ်းမဲ့ ဒီအချိန်မှာ လုပ်လို့ မရသေး ဘူးတဲ့၊ ဒီမိုကရေစီဆိုတာ ဒီနိုင်ငံရဲ့ မွေးကင်းစ ကလေးလိုပဲ ရှိပါသေးတယ်။ နောက်တော့ တဖြည်းဖြည်းနဲ့ လျှော့ပေါ့ပြီးတော့ ဥပဒေတွေပြဋ္ဌာန်းပြီး အဆင့်ဆင့်လုပ်လာရင် ဒီ ဥပဒေတွေဟာ သီးခြား ဒီလွှတ်တော်မှာ ပြဋ္ဌာန်းစရာမလိုဘဲနဲ့ တစတစနဲ့ သူတို့က လျှော့ပေါ့ပြီး တိုးလာဖို့ အခြေအနေ ရှိပါတယ်လို့ ပြောပါတယ်။”

စာပေစိစစ်ရေးကို ဝေဖန်နေကြပေမယ့် ဒီစာပေစိစစ်ရေးဟာ မီဒီယာသမားတွေ အပေါ် အကျိုးရှိစေပါတယ်လို့ ကာကွယ်ပြောကြားသွားတယ်လို့လည်း အဲဒီကိုယ်စားလှယ် က ပြန်ပြောပြပါတယ်။

“ဦးကျော်ဆန်းက စာပေစိစစ်ရေးဆိုတာ နှစ်ဘက် ညှိနှိုင်းဖြေရှင်းရပါတယ်။ သတိ ပေးလို့လည်း ရပါတယ်။ စာပေထုတ်ဝေခွင့်ကို ခေတ္တရပ်ဆိုင်းထားလို့ ရပါတယ်။ ဒါကြောင့် မနစ်နာပါဘူးတဲ့။ ဥပဒေအရ အရေးယူတယ်ဆိုတာကတော့ ပြတ်သားတယ်၊ တိကျတယ်၊ ပြင်းထန်တယ် အဲဒါကြောင့် အဲဒီလိုအခြေအနေမျိုး မရောက်ခင် စာပေစိစစ်ရေးအဖွဲ့က ဟန့်တားပေးရတာအတွက် အဲဒါဟာ နှစ်ဦးနှစ်ဘက် အကျိုးရှိပါတယ်လို့ ဖြေသွားပါတယ်။”

ဒီကနေ့ ပြည်သူ့လွှတ်တော်အစည်းအဝေးမှာ ဦးသိန်းညွန့်တင်သွင်းတဲ့ နိုင်ငံတကာစံချိန်စံညွှန်းနဲ့ညီတဲ့ အလုပ်သမား အခွင့်အရေးကာကွယ်တဲ့ဥပဒေ ပြဋ္ဌာန်းဖို့ အဆိုကိုလည်း သက်ဆိုင်ရာဝန်ကြီးဌာနက လုပ်ဆောင်နေပြီဖြစ်တာကြောင့် အတည်မပြုဘဲ မှတ်တမ်းအဖြစ် ထားရှိခဲ့ပါတယ်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ အင်တာဗျူး မျက်နှာဖုံးအဖြစ် ဖော်ပြခဲ့တဲ့ Messenger News Journal ဂျာနယ်ကို စာပေစိစစ်ရေးက နောက်ဆက်တွဲသတင်းတင်ပြခွင့်နဲ့ နောက်ဆုံးရသတင်းတွေ မျက်နှာဖုံးမှာ ဖော်ပြခွင့်တွေကို သီတင်းပတ်တခုထိ ပိတ်ပင်ပြီး အရေးယူလိုက်ပါတယ်။

စာပေစိစစ်ရေးက ဒီကနေ့မနက်ပိုင်းမှာ ဂျာနယ်တိုက်ကို ပိတ်ပင်ကြောင်း အကြောင်းကြားခဲ့တာဖြစ်ပြီး မကြာသေးခင်ကမှ အသစ်ပြဋ္ဌာန်းတဲ့ ပုံနှိပ်ထုတ်ဝေရေး နည်းဥပဒေတွေနဲ့ ငြိစွန်းခဲ့တယ်ဆိုပြီး အရေးယူလိုက်တာလို့ Messenger ဂျာနယ်ရဲ့ အယ်ဒီတာတဦးက ပြောပါတယ်။

“ဒီနေ့မနက်မှာ ကျနော်တို့ ဂျာနယ်တွေ တင်ပြခွင့်ရတယ်။ နောက်ဆက်တွဲ အချပ်ပို ၂ မျက်နှာရယ်၊ အဖုံးရယ်၊ ကျနော်တို့ တင်ပြလို့ မရဘူး၊ ပိတ်လိုက်ပါတယ်။ အဓိက ပိတ်လိုက်တာကတော့ စာပေစိစစ်ရေးက ချမှတ်ထားတဲ့ မူကို ချိုးဖောက်တဲ့အတွက် အပိတ်ခံရတာပါ။”

Messenger Journal ကို အရေးယူလိုက်တဲ့ ပုံနိုပ်ထုတ်ဝေရေး ဥပဒေအသစ်တွေဟာလည်း ဒေါ်အောင်ဆန်းစုကြည် ပြန်လွတ်လာစဉ်က ဂျာနယ်အများစု မျက်နှာဖုံးအဖြစ် ဖော်ပြခဲ့ကြတဲ့အပေါ် အရေးယူဖို့ ၁၉၆၂ ခုနှစ် ပုံနိုပ်ထုတ်ဝေသူများဆိုင်ရာ ဥပဒေတွေကို ပြင်ဆင်ဖြည့်စွက်ခဲ့တဲ့ ဥပဒေဖြစ်ပါတယ်။

ဒီလို အရေးယူခံရတဲ့အပေါ် Messenger ဂျာနယ်ရဲ့ အယ်ဒီတာက “စာပေစိစစ်ရေးကလည်း သူတို့သတ်မှတ်ထားတဲ့မူတွေ ရှိတယ်။ ချမှတ်ထားတဲ့မူအတိုင်း ကျနော်တို့ကလုပ်ရတာပေါ့။ တခါတလေကျရင် ကျနော်တို့ဘက်က ရည်ရွယ်ချက်နဲ့ ချိုးဖောက်တာမျိုး မဟုတ်ပေမယ့် အခြေအနေအရ အချိန်အခါအရ လုပ်လိုက်ရတာလေးတွေ ရှိတယ်။ ကျနော်တို့မှာ တခါတလေ အဆင်မပြေတာလေးတွေရှိတယ်။ စာပေစိစစ်ရေးဘက်ကကြည့်တော့ ချမှတ်ထားတဲ့ မူနဲ့ ငြိတယ်ပေါ့ဗျာ။”

အခုပိတ်ပင်ခံရတဲ့ ဒေါ်အောင်ဆန်းစုကြည် အင်တာဗျူးဖော်ပြခွင့် ရရှိခဲ့တဲ့ Messenger ဂျာနယ်ဟာ လက်ရှိ ပြည်ထောင်စုရွေးကောက်ပွဲကျင်းပရေး ကော်မရှင်ဥက္ကဋ္ဌ အဖြစ် တာဝန်ယူထားတဲ့ ဗိုလ်ကြီးဟောင်း ဦးတင်အေးရဲ့သား ဦးဇော်မင်းအေး ထုတ်ဝေနေတဲ့ ဂျာနယ်ဖြစ်ပါတယ်။

ပြည်သူ့လွှတ်တော်အစည်းအဝေးမှာ ရွေးကောက်ပွဲကျင်းပရေးကော်မရှင်က တင်သွင်းတဲ့ ရွေးကောက်ပွဲဥပဒေ ပြင်ဆင်ချက် တွေကို ကိုယ်စားလှယ်တဦးက ကန့်ကွက်လို့ ဗြောင်မဲခွဲရာမှာ မဲအပြတ်အသတ်နဲ့ ရှုံးသွားပါတယ်။

ပြည်ထောင်စု ရွေးကောက်ပွဲ ကျင်းပရေးကော်မရှင်အဖွဲ့ဝင် ဦးညွန့်တင် တင်သွင်းတဲ့ ပြည်သူ့လွှတ်တော် ရွေးကောက်ပွဲ ဥပဒေ ပြင်ဆင်ဖြည့်စွက်ချက်အရ နိုင်ငံတော်ပုန်ကန်မှု၊ ဖွဲ့စည်းပုံအခြေခံဥပဒေကိုဆန့်ကျင်မှု၊ တရားမ၀င်အသင်းအဖွဲ့တွေနဲ့ ဆက်ဆံမှု စတဲ့ပြစ်မှုကြောင့် ပြစ်ဒဏ်ကျခံရတဲ့ ကိုယ်စားလှယ်ဟာ ရာသက်ပန် ရွေးကောက်ပွဲဝင်ခွင့် မရှိတော့ပါဘူး။

ဒီပြင်ဆင်ချက်အဆိုကို အမျိုးသားဒီမိုကရေစီအင်အားစုပါတီ စမ်းချောင်းမြို့နယ် ကိုယ်စားလှယ် ဦးစိုးဝင်းက ကန့်ကွက် ဆွေးနွေးရာမှာ မဲခွဲတာလို့ မြေပုံမဲဆန္ဒနယ် ကိုယ်စားလှယ် ဦးဖေသန်းက ပြောပြပါတယ်။“အခု လွှတ်တော်ကိုယ်စားလှယ်ထဲမှာလည်း နိုင်ငံတော်ပုန်ကန်မှု၊ လက်နက်ကိုင် တော်လှန်မှု၊ ထောင်ကျတဲ့အမှုတွေ အများကြီးပါတဲ့။ အခုမှ လာမယ့်ရွေးကောက်ပွဲတွေမှာ ဒီဥပဒေနဲ့ ချုပ်ကိုင်တဲ့ဟာကိုတော့ ကျနော်တို့ မကြိုက်ပါဘူးလို့ ဦးစိုးဝင်းက တင်ပြတယ်။ ဒီကိစ္စနဲ့ ကန့်ကွက်တာ၊ ထောက်ခံတာကို မတ်တတ်ရပ် မဲပေးကြတယ်။ အဲဒီမှာ ထောက်ခံ တာက ၃၁ မဲ၊ ကြားနေက ၈ မဲ၊ ကန့်ကွက်မဲက ၃၈၂ မဲပေါ့။ အဲဒီလိုနဲ့ ဦးစိုးဝင်းအဆိုက ရှုံးနိမ့်သွားပါတယ်။”

ကော်မရှင်ရဲ့ပြင်ဆင်ချက်အဆိုနဲ့ ပတ်သက်လို့လည်း ဝေဖန်ပြောကြားသွားပါတယ်။

“နိုင်ငံရေးသမားဆိုတာက အချိန်မရွေး ဘယ်သူပဲဆိုဆို နိုင်ငံရေးလောကနဲ့ အပြစ်ခံရတဲ့ပေါ်မှာ ဒီပုဒ်မက အကျုံးမ၀င်သင့်ပါဘူး။ အဲဒီလူတွေက ဒီပုဒ်မအရလည်း ပြစ်ဒဏ်ကျခံပြီးဖြစ်တယ်။ အဲဒီအပေါ်မှာ နောက်တခါ ရွေးကောက်ပွဲမ၀င်ရဆိုတဲ့ ကန့် သတ်ချက်များ မရှိသင့်ပါဘူး။”

ရွေးကောက်ပွဲကော်မရှင် တင်သွင်းတဲ့ ဥပဒေပြင်ဆင်ရေးထဲက  ရွေးကောက်ပွဲရလဒ်ကို မြို့နယ်အဆင့်က မကြေညာဘဲ ခရိုင်အဆင့်က ကြေညာဖို့ ပြင်ဆင်ချက်အဆိုကတော့ ပြည်သူ့လွှတ်တော်မှာ ရှုံးနိမ့်ပြီး အမျိုးသားလွှတ်တော်မှာ အနိုင်ရထားပါတယ်။

ပြည်သူ့လွှတ်တော်အစည်းအဝေးမှာ သင်္ဃန်းမဲဆန္ဒနယ်က ကိုယ်စားလှယ် ဦးသိန်းညွန့် နိုင်ငံတကာအဆင့်မီ အလုပ်သမား အခွင့်အရေး ဥပဒေသစ်မူကြမ်းရေးဆွဲဖို့နဲ့ သတင်းမီဒီယာတွေ လွတ်လွတ်လပ်လပ် ထုတ်ဖော်ခွင့်ကို အကာအကွယ် ပေးရေးဥပဒေ ပြဌာန်းရေး အဆို တင်သွင်းသွားပြီး မနက်ဖြန် ဆွေးနွေးမှာပါ။

အစိုးရနဲ့ ပဋိပက္ခဖြစ်နေတဲ့ တိုင်းရင်းသားလက်နက်ကိုင် အဖွဲ့အစည်းတွေဟာ အမျိုးမျိုးတောင်းဆိုပြီး မရိုးမသား အခွင့်အရေးယူတယ်လို့ အစိုးရပြောခွင့်ရပုဂ္ဂိုလ် ပြန်ကြားရေး ၀န်ကြီးက ပြည်သူ့လွှတ်တော်မှာ ထပ်ပြီးပြောလိုက်ပါတယ်။

ငြိမ်းချမ်းရေးကော်မရှင်ဖွဲ့စည်းရေး၊ အစိုးနဲ့ တိုင်းရင်းသားလက်နက်ကိုင် အဖွဲ့အစည်းတွေ ဆွေးနွေးမှုအခြေအနေတို့နဲ့ ပတ်သက်ပြီး ရှမ်းတိုင်းရင်းသားများဒီမိုကရက်တစ် ပါတီ ရှမ်းပြည်နယ် ကွန်ဟိန်းမဲဆန္ဒနယ်က ကိုယ်စားလှယ် ဒေါ်နန်းဝါနုက မေးမြန်းရာမှာ ပြန်ကြားရေးဝန်ကြီး ဦးကျော်ဆန်းက အဲဒီလို ပြောသွားတာပါ။ဒီပြောဆိုချက်မျိုးးကို ဦးကျော်ဆန်းဟာ ပြီးခဲ့တဲ့ ၁/၂၀၁၁ သတင်းစာရှင်းလင်းပွဲ တုန်းကလည်း ပြောကြားသွားဖူးပါတယ်။

“အစိုးရကနေ အပစ်အခတ် ရပ်စဲခဲ့တာကို အခွင့်ကောင်းယူပြီးတော့ တောတွင်း လက်နက်ကိုင် အဖွဲ့အစည်းတွေက စစ်ရေးလှုပ်ရှားမှုတွေ၊ လူသစ်စုဆောင်းမှုတွေ ရှိပါ တယ်။ အစကတည်းက မရိုးမသား အခွင့်အရေးတွေ ယူခဲ့တာကြောင့် ဆွေးနွေးပွဲတွေက မပြေမလည်ဖြစ်ခဲ့ရတယ်” လို့ ဦးကျော်ဆန်းက ပြောသွားကြောင်း အစည်းအဝေးတက်တဲ့ မြေပုံမြို့နယ်ကိုယ်စားလှယ် ဦးဖေသန်းက ပြောပြပါတယ်။

“ငြိမ်းချမ်းရေးဆိုတာ တဖက်တည်း ဆောင်ရွက်လို့မရဘူး။ နှစ်ဖက်လုံး ပူးပေါင်း ဆောင်ရွက်မှ ရမယ်။ ကေအိုင်အေ၊ ကေအိုင်အိုအနေနဲ့ အတတ်နိုင်ဆုံး လိုက်လျောဆွေး နွေးခဲ့သော်လည်း ကေအိုင်အေ၊ ကေအိုင်အိုအဖွဲ့များအနေနဲ့ တောင်းဆိုမှုတွေ တခုပြီးတခု လုပ်လာတာကြောင့် ငြိမ်းချမ်းရေးဆွေးနွေးတာ အဆင်မပြေဖြစ်ခဲ့တယ်” လို့ ပြောသွား တယ်လို့ ဆိုပါတယ်။

ငြိမ်းချမ်းရေးအတွက် ကော်မရှင်တွေဖွဲ့စည်းစေလွှတ်ပြီး ပထမအဆင့် ယာယီ အပစ်အခတ် ရပ်စဲရေးနဲ့ ဒုတိယအဆင့် လုံးဝငြိမ်းချမ်းရေးကို ဖော်ဆောင်သွားမယ်လို့ လည်း ဦးကျော်ဆန်းက ပြောကြားသွားတယ်လို့ ဆိုပါတယ်။

လက်နက်ကိုင်အဖွဲ့အစည်းတွေ တွေ့ဆုံဆွေးနွေးပွဲ စကားဝိုင်းကို ရောက်လာအောင် ဆောင်ရွက်ကြဖို့လည်း လွှတ်တော် ကိုယ်စားလှယ်တွေကို ၀န်ကြီးက တိုက်တွန်း တယ်လို့ ဦးဖေသန်းက ပြောပြပါတယ်။

“နောက်ကွယ်က ကြိုးကိုင်မှုကင်းတဲ့ ရိုးသားတဲ့ စိတ်ကောင်းစေတနာကောင်းတွေ အခြေခံပြီးတော့ ဆွေးနွေးပွဲများ ဖြစ်ပေါ်အောင် တိုက်တွန်းပြောဆိုပေးကြပါလို့ ပြောပါတယ်။ အခြေခံဥပဒေနဲ့ ဒို့တာဝန်အရေးသုံးပါးကို မထိခိုက်စေဘဲ ငြိမ်းချမ်းရေး ဆွေးနွေးပွဲ များကို ဆက်လုပ်သွားမှာဖြစ်တယ်လို့ ပြောသွားပါတယ်။”

ငြိမ်းချမ်းရေးဆွေးနွေးမှုမှာ ဒို့တာဝန်အရေးသုံးပါကို အခြေခံဖို့ အဆိုကို ဒီနေ့ လွှတ်တော်မှာ အတည်ပြုထားတယ်။

ငြိမ်းချမ်းရေးကော်မရှင်မှာ ဒေါ်အောင်ဆန်းစုကြည်လို လူထုခေါင်းဆောင်တဦး ပါဝင်ဖို့ တိုင်းရင်းသားလွှတ်တော် ကိုယ်စားလှယ်တချို့က ဆွေးနွေးထားတာကိုတော့ လက်ခံမထားပါဘူး။

အစိုးရစစ်တပ်နဲ့ ကချင်၊ ကရင်၊ ရှမ်း စတဲ့ တိုင်းရင်းသားလက်နက်ကိုင်အဖွဲ့အစည်းတွေ တိုက်ပွဲတွေ ဖြစ်နေပါတယ်။

မြန်မာ (Myanmar) ကို ဘားမား (Burma) လို့ ခေါ်ဝေါ်သုံးနှုန်းသူတဦးဟာ ငြိမ်း ချမ်းရေးကော်မရှင်မှာ မပါဝင်သင့်ဘူးလို့ ဒီနေ့ အမျိုးသားလွှတ်တော်အစည်းအဝေးမှာ ပြည်ခိုင်ဖြိုးပါတီဝင် ကိုယ်စားလှယ်တဦးက ပြောသွားတယ်လို့ သိရပါတယ်။

ဒီအစည်းအဝေးမှာ “လက်နက်ကိုင် ပဋိပက္ခတွေကို ငြိမ်းချမ်းရေးနဲ့ အပစ်အခတ် ရပ်ဆိုင်းရေးအတွက် တွေ့ဆုံဆွေးနွေး နိုင်ဖို့နဲ့ ဒီလိုဆွေးနွေးရာမှာ ဒို့တာဝန်အရေးသုံးပါးကို ထိပါးမခံဘဲ ဆွေးနွေးကြဖို့” အဆိုကို ရန်ကုန်မဲဆန္ဒနယ်အမှတ် (၁၂) က ကိုယ်စားလှယ် ဦးဆွေအောင်က တင်သွင်းပါတယ်။

ဒီအဆိုကို ရခိုင်တိုင်းရင်းသားများတိုးတက်ရေးပါတီက ဒေါက်တာအေးမောင်နဲ့ ချင်းတိုးတက်ရေးပါတီက ဦးပေါ်လျှံလွင်စတဲ့ ကိုယ်စားလှယ်တွေက ဒေါ်အောင်ဆန်းစုကြည်စတဲ့ တိုင်းသိပြည်သိ၊ အများကြည်ညိုလေးစားသူတွေလည်း ပါဝင်ဖို့ ဆွေးနွေးပါတယ်။

ဒါကို ပြည်ခိုင်ဖြိုးပါတီက မကွေးတိုင်းဒေသကြီး မဲဆန္ဒနယ်အမှတ် (၁၂) ကိုယ်စား လှယ် ဦးလှဆွေက ဆွေးနွေးတဲ့အခါ “မြန်မာကို မြန်မာလို့မခေါ်ဆိုနိုင်ပဲနဲ့ ဘားမားလို့ ခေါ်တာကို ငြိမ်းချမ်းရေးကော်မရှင်မှာ ထည့်မယ်ဆိုရင် ကျနော်တို့ သံသယရှိပါတယ်” လို့ ထည့်ပြောသွားကြောင်း လွှတ်တော်တက်ရောက်သူတဦးဖြစ်တဲ့ ဦးဘုန်းမြင့်အောင်က ပြောပြပါတယ်။မွန်ဒေသလုံးဆိုင်ရာဒီမိုကရေစီပါတီက ဒေါက်တာဗညားအောင်မိုးကတော့ တိုင်းရင်းသားလက်နက်ကိုင် အဖွဲ့တွေနဲ့ ဆွေးနွေးရာမှာ ကြိုတင်ကန့်သတ်ချက်တွေ ရှိနေတဲ့အချက်ကို ထောက်ပြဆွေးနွေးသွားတယ် လို့လည်း ပြောပါတယ်။

“ငြိမ်းချမ်းရေး ဆွေးနွေးပွဲဆိုတာ ကြိုတင်ကန့်သတ်ချက်ရှိရင် မကောင်းဘူးပေါ့။ အဲဒီတော့ ဒီငြိမ်းချမ်းရေး ဆွေးနွေးပွဲကို လိုအပ်ချက်အရ အချိန်များစွာ သင်ခန်းစာယူပါတဲ့။ ဒီလိုကန့်သတ်ချက်ကိုတော့ ကြိုတင်ကန့်သတ်ချက်ဖြစ်တဲ့အတွက် မထည့်ပါနဲ့တဲ့။”

ချင်းတိုးတက် ရေးပါတီက ဦးပေါ်လျှံလွင်ကလည်း လူနည်းစု တိုင်းရင်းသားပါတီ အနေနဲ့ ရင်ဆိုင်ရတာတွေကို တင်ပြသွားတယ်လို့ ဆိုပါတယ်။

“သူတို့အနေနဲ့ ၂၀၀၈ ဖွဲ့စည်းပုံ အခြေခံဥပဒေကို လက်ခံခဲ့တာကော၊ ဒီ ၂၀၁၀ ရွေး ကောက် ပွဲဝင်ခဲ့တဲ့အတွက်ကိုရော အများကြီးပဲ ကဲ့ရဲ့ခြင်းခံခဲ့ရပါတယ်တဲ့။ ကဲ့ရဲ့ခြင်းခံရ တယ်တဲ့။ ဒီလွှတ်တော်ထဲကို ရောက်လာတဲ့အခါမှာလည်း အမတ်အင်အားကလည်း နည်း တယ်၊ တိုင်းရင်းသားတွေဖြစ်တဲ့အတွက် များစွာမျက်နှာငယ် နေပါတယ်တဲ့။ ဗမာလူမျိုးတွေ နဲ့ ငြိမ်းချမ်းရေးယူတဲ့အခါမှာလည်း အကိုကြီးတွေအရနဲ့ အားကိုးချင်ပါတယ်တဲ့။ အကိုကြီး အရာ နေပေးပါပေါ့။”

တပ်မတော်သားကိုယ်စားလှယ်တွေက ဆွေးနွေးရာမှာတော့ တပ်မတော်က တာ ၀န်ယူခဲ့တဲ့ နှစ် ၅၀ နီးပါးမှာ ပြည်တွင်းငြိမ်းချမ်းရေးကို မဖော်ဆောင်နိုင်တာကြောင့် ဖွံ့ဖြိုးတိုး တက်မှု နောက်ကျခဲ့ရတယ်ဆိုတဲ့ အချက်တွေကို အဓိက ဆွေးနွေးသွားကြတယ်လို့လည်း လွှတ်တော်ကိုယ်စားလှယ်တချို့က ပြောပါတယ်။

ဒီအဆိုကို အမျိုးသားလွှတ်တော်ဥက္ကဌ ဦးခင်အောင်မြင့်က အဆိုအဖြစ် အတည်ပြု ရုံမက ကိုယ်စားလှယ် ၁၄ ဦး ဆွေးနွေးသွားတဲ့ အကြောင်းအရာတွေကို ပြီးခဲ့တဲ့ရက်ပိုင်းက ဖွဲ့စည်းထားတဲ့ အမျိုးသားလွှတ်တော် တိုင်းရင်းသားရေးရာနှင့် ငြိမ်းချမ်းရေးကော်မတီက စာတမ်းပြုစုပြီး လွှတ်တော်မှတ်တမ်းအဖြစ် ထားရှိဖို့ ဆုံးဖြတ်သွားပါတယ်။

ပြည်သူ့လွှတ်တော်မှာလည်း ပြည်တွင်းငြိမ်းချမ်းရေးနဲ့ပတ်သက်တဲ့ မေးခွန်းတွေကို အစိုးရပြောခွင့်ရပုဂ္ဂိုလ် ပြန်ကြားရေး ၀န်ကြီးက ဆောင်ရွက်နေကြောင်း ဖြေကြားသွားတယ်လို့ သိရပါတယ်။

အစိုးရသစ်က ဒီလ ၅ ရက်မှာ အဖွဲ့ဝင် ၁၅ ဦးပါဝင်တဲ့ မြန်မာနိုင်ငံအမျိုးသား လူ့အခွင့်အ ရေးကော်မရှင်ကို ဖွဲ့စည်းလိုက်ပါတယ်။

၂၀၀၈ ဖွဲ့စည်းပုံအခြေခံဥပဒေပါ နိုင်ငံသားတွေရဲ့ မူလအခွင့်အရေးတွေ မြှင့်တင် ရေး၊ ကာကွယ်ရေး ဆောင်ရွက်ဖို့ ဒီကော်မရှင်ကို ဖွဲ့စည်းတာလို့ အစိုးရကြေညာချက်က ဆိုပါတယ်။

ကော်မရှင်ရဲ့ ခေါင်းဆောင်တွေအဖြစ် ပါဝင်ဆောင်ရွက်မယ့်သူတွေဟာ စစ်အစိုးရ လက်ထက်တုန်းက မြန်မာ့လူ့အခွင့်အရေးကိစ္စတွေနဲ့ ပတ်သက်ပြီး ခုခံကာကွယ်ပြောဆိုခဲ့ သူတွေ အများစုပါဝင်နေတဲ့အပေါ် ဝေဖန်မှုတွေရှိနေပါတယ်။

ပြည်တွင်းပြည်ပ လူ့အခွင့်အရေးအဖွဲ့အစည်းတွေကတော့ လူ့အခွင့်အရေးကော်မရှင် ဖွဲ့စည်းတာကို အပြုသဘောဆောင် ကြိုဆိုသူရှိသလို ဒီကော်မရှင်ရဲ့ လုပ်ဆောင်နိုင်မှုအပေါ် သံသယရှိနေသူလည်း ရှိပါတယ်။

ဒီကော်မရှင်ဖွဲ့စည်းတဲ့ကိစ္စနဲ့ ပတ်သက်ပြီး လူ့အခွင့်အရေးကာကွယ်မြှင့်တင်သူများ ကွန်ရက် (HRDP-Human Rights Defenders and Promoters network) ပြောရေးဆိုခွင့်ရှိသူ ဦးမောင်မောင်လေးကို မေးမြန်းထားပါတယ်။

အစိုးရသစ်က  လူ့အခွင့်အရေးကော်မရှင်တရပ် ဖွဲ့စည်းလိုက်တဲ့အပေါ် ဦးမောင်မောင်လေး တို့ အမြင်သဘောထား ဘယ်လိုရှိလဲ။

“အခုပေါ်ပေါက်လာတဲ့ လူ့အခွင့်အရေး ကော်မရှင်က တကယ်ပဲ လူ့အခွင့်အရေးတွေကို တိုးတက်ဖြစ်ပေါ်လာဖို့၊ လူ့အခွင့်အရေး  ချိုးဖောက်ခံနေရမှုတွေကို တကယ် အကာအ ကွယ်ပေးဖို့ ရည်ရွယ်ချက်တွေနဲ့ ဖွဲ့တာလား၊ တကယ်ရော အဲဒီအဖွဲ့အစည်းတွေက လုပ်ဆောင်နိုင်ပါ့မလားဆိုတာ ကျနော်တို့ အများကြီးစောင့်ကြည့်ရမှာပါ။ နောက်တချက်က အစိုးရက လူ့အခွင့်အရေး ချိုးဖောက်မှုတွေကို ဖာထေးဖို့ နိုင်ငံတကာရဲ့အမြင်တွေကို ငြင်း ဆန်ဖို့အတွက် ဖွဲ့ထားတဲ့ အဖွဲ့အစည်းလားဆိုတာ အင်မတန်အရေးကြီးပါတယ်။

“ကျနော်တို့ကတော့ လူ့အခွင့်အရေးကော်မရှင်ကို ဗမာပြည်မှာ ပေါ်လာတာကို မူအားဖြင့်တော့ ကြိုဆိုပါတယ်။ ဒါပေမယ့် သူတို့က အစိုးရအကျိုးအတွက် လုပ်မှာလား။ လူအခွင့်အရေးနဲ့ လူတွေရဲ့ အခြေခံအခွင့်အရေးတွေအတွက် တကယ်အကျိုးပြုတဲ့ အလုပ်တွေကို လုပ်မှာလား။ ဒါမှမဟုတ် လူ့အခွင့်အရေး ချိုးဖောက်ခံရတဲ့ ကိစ္စတွေကို တကယ် အကာအကွယ်ပေးဖို့ လူ့အခွင့်အရေး အသိတရားတွေကို တကယ်မြှင့်တင်တဲ့ အဖွဲ့ကြီးဖြစ်ဖို့ဆိုတာတော့ အများကြီး စောင့်ကြည့်ရမှာပါ။”

ဒီကော်မရှင်က ၂၀၀၈ ဖွဲ့စည်းပုံအခြေခံဥပဒေအရ နိုင်ငံသားတွေရဲ့ မူလအခွင့်အရေးတွေ ကို ကာကွယ်မြှင့်တင်ဖို့လို့ ဆိုပါတယ်။ ဘယ်အတိုင်းအတာအထိများ လုပ်နိုင်ဆောင်နိုင်ပါ့ မလဲ။

“ဖွဲ့စည်းပုံ အခြေခံဥပဒေမှာကိုက စစ်တပ်နဲ့ပတ်သက်လာတဲ့ အဖြစ်အပျက်ကိစ္စ မှန်သမျှကို စစ်တပ်အတွက်ကျင့်သုံးမယ့် တရားဥပဒေပြုမဏ္ဍိုင်၊ တရားစီရင်ရေးမဏ္ဍိုင်ကနေ ကိုင် တွယ်ခွင့်ရှိတာကို၊ ဒီအမှုတွေဆို အရပ်သားရုံးတွေတောင် ရောက်ခွင့်မှ မရှိဘူး။ ဖွဲ့စည်းပုံ အနေအထားအရကို လူ့အခွင့်အရေးကော်မရှင်အနေနဲ့ လုပ်နိုင်ဖိုိ့ဆိုတာ အင်မတန် အခက်အခဲတွေ့မှာပါ၊ လုပ်နိုင်လိမ့်မယ်လို့ မထင်ပါဘူး။

“နောက်တချက်က လူ့အခွင့်အရေးကော်မရှင် ပေါ်ပေါက်လာတာက ဘာလုပ်မလို့ လဲဆိုတော့ ဖွဲ့စည်းပုံအခြေခံဥပဒေထဲမှာ ပါတဲ့ အခန်း ၈ မှာ နိုင်ငံသားများရဲ့ မူလတာဝန် နှင့် အခွင့်အရေးများဆိုတဲ့ အခန်းပေါ့၊ အဲ့ဒီအတိုင်း အကောင်အထည်ဖော် ဆောင်ရွက်ဖို့ ပြောတယ်၊ အကောင်အထည်ဖော် ဆောင်ရွက်ဖို့ဆိုရင် ဒီအခန်း ၈ မှာ ပြဋ္ဌာန်းထားတာကို က နိုင်ငံသားတွေရဲ့ အခွင့်အရေးတွေကို ပုံစံမျိုးစုံနဲ့ ချုပ်နှောင်ထိန်းချုပ်ထားတာတွေ ပါ တယ်၊ အခြေခံလူ့အခွင့်အရေးနဲ့ မညီတဲ့ကိစ္စတွေ အများကြီးရှိနေတယ်၊ အဲဒီမှာတင် သူတို့ ရဲ့ လုပ်နိုင်မှုအနေအထားက ပိုပြီးအလှမ်းကွာသွားမယ်လို့ ကျနော်တို့ ထင်ပါတယ်။”

ဒီကော်မရှင်အနေနဲ့ ကျနော်တို့နိုင်ငံမှာ ဖြစ်ပေါ်နေတဲ့ လူ့အခွင့်ရေးဆိုင်ရာ ပြဿနာတွေထဲက ဘယ်လိုကိစ္စရပ်တွေကို ပထမဆုံး ဖြေရှင်းနိုင်ဖို့ လိုအပ်တယ်လို့ ထင်မိလဲ။

“သူတို့ဖြေရှင်းရမယ့်ကိစ္စက နိုင်ငံရေးအယူအဆတွေ မပြောခင်၊ ကျနော်တို့ လူ့အခွင့်အရေး အနေနဲ့ပြောရင် မိမိရဲ့ လွတ်လပ်စွာစုဝေးပိုင်ခွင့်ကိုသော်လည်းကောင်း၊ မိမိရဲ့လွတ်လပ်စွာ ထင်မြင်ယူဆပိုင်ခွင့်ကိုသော်လည်းကောင်း၊ မိမိရဲ့ လွတ်လပ်စွာ ဝေဖန်မှုကိုသော်လည်း ကောင်း ပြုကျင့်ခဲ့လို့ လက်ရှိထောင်ထဲမှာရှိနေတဲ့ အကျဉ်းသားတွေကို ချက်ချင်းလွှတ်ရမှာ ပေါ့၊ ယုံကြည်ချက်ကြောင့်၊ လူ့အခွင့်အရေးကြောင့်၊ နိုင်ငံရေးကြောင့် အကျဉ်းကျနေသူ တွေကို ချက်ချင်းလွှတ်ပေးရမယ်။ ဒါဆိုရင်တော့ ပထမဆင့်အနေနဲ့ အခြေခံလူ့အခွင့်အရေး ချိုးဖောက်ခံနေရတဲ့ အချက်တချက်ကို ကုစားပေးနိုင်တဲ့ အချက်ဖြစ်မှာပါ။

“အခြားအလားတူ ကိစ္စလေးတွေ ဗမာပြည်မှာ အများကြီးရှိသေးတယ်။ ပထမဆုံး အဲဒီအချက်ကို လုပ်ပေးသင့်ပါတယ်။ တခြားကိစ္စတွေက ပြောရမယ်ဆိုရင် ဥပမာ၊ ဖွဲ့စည်းပုံ အခြေခံဥပဒေကနေစပြီး ပြည်တွင်းပြဋ္ဌာန်းတဲ့ ဥပဒေအများစုက လူ့အခွင့်အရေးနဲ့ မညီတဲ့ ကိစ္စတွေ ရှိတယ်။ အဲဒီကိစ္စတွေကို အခု အသစ်ပေါ်ပေါက်လာတဲ့ လူ့အခွင့်အရေးကော်မ ရှင်အနေနဲ့ ဗမာပြည်တွင်းမှာရှိတဲ့ ဥပဒေတွေကို ကုလသမဂ္ဂလူ့အခွင့်အရေး ကြေညာစာ တမ်းကြီးနဲ့အညီ   ဥပဒေတွေကို ပြုပြင်သင့်တာ၊ ပြင်ဆင်သင့်တာ၊ ပြောင်းလဲသင့်တာတွေ ဒုတိဆင့်အနေနဲ့ လုပ်ရပါလိမ့်မယ်။”

အမျိုးသားအဆင့်လူ့အခွင့်အရေးကော်မရှင်ဝင်ဖြစ်လာတဲ့ ပုဂ္ဂိုလ်တွေနဲ့ အစိုးရအဖွဲ့ကိုရော ဦးမောင်မောင်လေးတို့အနေနဲ့ ဘာတွေများ တိုက်တွန်းပြောကြားလိုတာတွေ ရှိမလဲ။

“လူ့အခွင့်အရေးကော်မရှင်ဆိုတဲ့ ခေါင်းစဉ်အောက်မှာ ဖြစ်တဲ့အတွက် ပါဝင်ဆောင်ရွက်မယ့် ပညာရှိပုဂ္ဂိုလ်များကို သော်လည်းကောင်း၊ ဒီအဖွဲ့အစည်းကိုသော်လည်းကောင်း ကျနော်တို့ လူ့အခွင့်အရေးအဖွဲ့အစည်းဖြစ်တဲ့အတွက် ဗမာပြည်မှာဖြစ်ပျက်နေတဲ့ ပြဿနာအားလုံးကို ဘက်လိုက်မှုတွေ၊ ချဉ်းကပ်မှုတွေ ကင်းကင်းရှင်းရှင်းနဲ့ လူ့အခွင့်အရေး အမြင်၊ အဓိကအားဖြင့် အခြေခံလူ့အခွင့်အရေးဖြစ်တဲ့ အပြည်ပြည်ဆိုင်ရာ လူ့အခွင့်အရေးကြေညာ စာတမ်းကြီးကို သူတို့အနေနဲ့ လက်ကိုင်ပြုစေချင်ပါတယ်။ အဲကြေညာစာတမ်းမှာပါဝင်တဲ့၊ အမြင်တွေ၊ အတွေးအခေါ်တွေနဲ့ အညီ ဆောင်ရွက်ဖို့တော့ ကျနော်တို့က အဲဒီအဖွဲ့အသီး သီးကို မေတ္တာရပ်ခံချင်ပါတယ်။

“အခြေခံလူ့အခွင့်အရေး အချက် ၃၀ ထဲက အပိုဒ်တွေအရ ဒီကိစ္စတွေ ပြုပြင်ပေးဖိုိ့၊ ပြောင်းလဲပေးဖိုိ့ အစိုးရအနေနဲ့ ဒီကိစ္စတွေမှာ အဓိက လုပ်သင့်ပါတယ်။ အဲဒါတွေ လုပ်နိုင် မယ်ဆိုရင် ကျနော်တို့ မြန်မာပြည်ရဲ့ လူ့အခွင့်အရေးပြဿနာတင် မဟုတ်ဘူး။ တခြား နိုင်ငံရေးပြဿနာ၊ စီးပွားရေး၊ လူမှုရေးပြဿနာတွေပါ ဖြေရှင်းနိုင်တဲ့လမ်းကြောင်းပေါ်ကို ရောက်လာလိမ့်မယ်လို့ ထင်ပါတယ်။ ဒါကြောင့် အစိုးရအနေနဲ့ ဒီကိစ္စတွေကို ဆောင်ရွက် သင့်ပါတယ်။ ဆောင်ရွက်ဖို့လည်း တိုက်တွန်းချင်ပါတယ်၊ အကြံပေးချင်ပါတယ်။”

အစိုးရက အသစ်ထပ်ဖွဲ့စည်းလိုက်တဲ့ မြန်မာနိုင်ငံ အမျိုးသားလူ့အခွင့်အရေး ကော်မရှင်အနေနဲ့ လူ့အခွင့်အရေးကိစ္စတွေကို အမှန်တကယ်ဆောင်ရွက်ဖို့ လိုအပ်တယ်လို့ ပြည်တွင်းပြည်ပ လူ့အခွင့်အရေးကာကွယ်လှုပ်ရှားသူတွေက ပြောပါ တယ်။

ဒီလ ၅ ရက်နေ့ ရက်စွဲနဲ့ အစိုးရက အငြိမ်းစားသံအမတ်ကြီးတွေ၊ အငြိမ်းစား တက္ကသိုလ်ပါမောက္ခတွေ၊ အစိုးရ၀န်ကြီးဌာနတွေက အငြိမ်းစားအရာရှိတွေနဲ့ ဖွဲ့စည်းလိုက်တဲ့ အဖွဲ့ဝင် ၁၅ ဦးပါ ကော်မရှင်ကို ပြည်တွင်းပြည်ပလူ့အခွင့်အရေး အဖွဲ့အစည်းတွေက သံသယနဲ့ ကြိုဆိုပြောကြားလိုက်ကြတာပါ။

လူ့အခွင့်အရေး ကာကွယ်မြှင့်တင်သူများ ကွန်ရက် (HRDP) ရဲ့ ပြောရေးဆိုခွင့်ရှိသူ ဦးမောင်မောင်လေးက     “အခုပေါ်ပေါက် လာတဲ့ လူ့အခွင့်အရေး ကော်မရှင်က တကယ်ပဲ လူ့အခွင့်အရေးတွေကို တိုးတက် ဖြစ်ပေါ်လာဖို့၊ လူ့အခွင့်အရေး ချိုးဖောက်မှု တွေကို တကယ်အကာအကွယ်ပေးဖို့ အဲဒီ ရည်ရွယ်ချက်တွေနဲ့ တကယ်ဖွဲ့တာလား။ တကယ်ရော အဲဒီအဖွဲ့အစည်းတွေက လုပ်ဆောင်နိုင်ပါ့မလားဆိုတာတော့ အများ ကြီး စောင့်ကြည့်ရမှာပါ။ နောက်တချက်က နိုင်ငံတကာမှာ အစိုးရရဲ့လူ့အခွင့်အရေး ချိုးဖောက်မှုတွေကို ဖာထေးဖို့ နိုင်ငံတကာနဲ့ အမြင်တွေကို ငြင်းဆန်ဖို့အတွက် ဖွဲ့စည်းထားတဲ့ အဖွဲ့လားဆိုတာ ဒါက အင်မတန်အရေးကြီးပါတယ်။

“ကျနော်တို့ကတော့ လူ့အခွင့်အရေးကော်မရှင် မြန်မာပြည်မှာ ပေါ်လာတာကို မူအားဖြင့် ကြိုဆိုပါတယ်။ ဒါပေမယ့် သူတို့က အစိုးရအကျိုးအတွက် လုပ်မှာလား။ လူ့အခွင့်အရေးနဲ့ လူတွေရဲ့ အခြေခံအခွင့်အရေးတွေအတွက် တကယ်အကျိုးပြုမယ့် အလုပ်ကိုလုပ်မှာလားပေါ့၊ လူ့အခွင့်အရေး အသိတရားတွေ တကယ်မြှင့်တင်တဲ့ အဖွဲ့ကြီးဖြစ်ဖို့ဆိုတာတော့ အများကြီး စောင့်ကြည့်ရမှာပါ”  လို့ ပြောပါတယ်။

ဒီလို လူ့အခွင့်အရေးကော်မတီမျိုး အရင် စစ်အစိုးရလက်ထက်ကရှိခဲ့ပေမယ့်လည်း လူ့အခွင့်အရေးချိုးဖောက်မှုတွေကို ကာကွယ်ပြောဆို လုပ်ဆောင်မှုတွေသာ ရှိခဲ့ပါတယ်။

ထိုင်းနိုင်ငံအခြေစိုက် လူ့အခွင့်အရေး ပညာပေးဌာန (မြန်မာနိုင်ငံ) ရဲ့ ဒါရိုက်တာ ဦးအောင်မျိုးမင်းက     “အလုပ်နဲ့သက်သေပြပါ၊ ဒါဆိုရင် ကျနော်တို့ ယုံကြည်မှာဖြစ်ပါတယ်။ ဒါပေမယ့် အရင်တုန်းက ဒီလိုမျိုး ဟန်ပြအနေနဲ့ လုပ်ဆောင်တာတွေ၊ တကယ်တန်းမဟုတ်ပဲ နိုင်ငံရေးခုတုံးလုပ်ပြီး လုပ်ဆောင်တာတွေကြောင့် ကျနော်တို့မှာ အမြဲတမ်းသံသယ ရှိနေရတယ်၊ အဲလိုဖြစ်နေရတာ သံသယရှိသူရဲ့ အပြစ်လား၊ သံသယဖြစ်အောင် လုပ်ခဲ့တဲ့ အစဉ်အလာတွေကြောင့်လားဆိုတာတော့ သဘောပေါက်စေချင်ပါတယ်” လို့ ပြောပါတယ်။

အခုဖွဲ့စည်းလိုက်တဲ့ အမျိုးသားလူ့အခွင့်အရေးကော်မရှင်ရဲ့ ခေါင်းဆောင်တွေအဖြစ် တာဝန်ယူဆောင်ရွက်မယ့်သူတွေဟာ အရစစ်အစိုးရလက်ထက်က လူ့အခွင့်အရေးချိုးဖောက်မှုတွေကို ခုခံပြောဆိုခဲ့သူတွေ ပါဝင်နေတယ်ဆိုတာကိုလည်း ဦးအောင်မျိုးမင်းက ပြောပါတယ်။

    “သူတို့တွေက တကယ်တမ်းလွတ်လပ်တယ်လို့ ပြောနိုင်မလား၊ အစိုးရရဲ့ သြဇာလွှမ်းမိုးမှု ဆက်လက်ရှိနေတဲ့သူတွေ ဖြစ်နေမလား၊ ဒါမှမဟုတ် အရင်ပုံစံအတိုင်း အစိုးရကိုယ်စား ကာကွယ်ပြောဆိုမယ့်သူတွေ ဖြစ်လာမလား၊ ဒီအချက်က အရမ်းအရေးကြီးပါတယ်၊ ဒီအထဲမှာ ပညာရှင်ပိုင်းအရ ကျနော်တို့ လေးစားရတဲ့ ဆရာ/ ဆရာမကြီးတွေ ပါပါတယ်၊ ဒါပေမယ့် ဒီဆရာ / ဆရာမကြီးတွေရဲ့ လုပ်ဆောင်နိုင်တဲ့ အနေအထားက ကန့်သတ်ထားတဲ့အရာတွေ၊ တကယ်တမ်း လူ့အခွင့်အရေးကို ကာကွယ်ချင်တာ မဟုတ်ဘဲနဲ့ ဟန်ပြအနေနဲ့ ဒါကို လုပ်ပြတဲ့သဘောမျိုး ဖြစ်နေရင် သူတို့အပေါ်မှာ လူတွေလေးစားတဲ့ အရာတွေ ထိခိုက်နိုင်ပါတယ်။”

အခုဖွဲ့စည်းထားတဲ့ လူ့အခွင့်အရေးကော်မရှင်အနေနဲ့ ပထမဆုံးအနေနဲ့ မြန်မာနိုင်ငံမှာ စစ်အစိုးရလက်ထက် လူ့အခွင့်အရေးချိုးဖောက်ခံရမှုတွေကြောင့် မိသားစုနဲ့ ဝေးလံတဲ့ အကျဉ်းထောင်တွေမှာ နှစ်ရှည်ထောင်ဒဏ်တွေကိုကျခံနေရတဲ့ နိုင်ငံရေးအကျဉ်းသားတွေကို အမြန်ဆုံးပြန်လွှတ်ပေးဖို့နဲ့ တိုင်းရင်းသား ဒေသတွေမှာ ဖြစ်ပွားနေတဲ့ လက်နက်ပိုင်ပဋိပက္ခတွေကြောင့် ဖြစ်ပေါ်နေတဲ့ လူ့အခွင့်အရေးချိုးဖောက်ခံရမှုတွေကို ပထမဆုံးအနေနဲ့ ထုတ်ဖော်လုပ်ဆောင်ဖို့ လိုအပ်မယ်လို့လည်း လူ့အခွင့်အရေးတက်ကြွလှုပ်ရှားသူတွေက ထောက်ပြပြောဆိုကြပါတယ်။